Տագնապը մեծ է՝ երաշխիք չկա, որ խոստումը կպահեն, և վտանգ չի սպառնա հայերին. Դամասկոսի թեմի առաջնորդ

Սիրիայում անհանգստություն կա, չկա երաշխիք, որ նոր ռեժիմի խոստումները կիրականանան: Այս մասին NEWS.am-ի «Ուժի գործոն» հաղորդման ժամանակ ասաց Հայ Առաքելական Եկեղեցու Դամասկոսի թեմի առաջնորդ, Գերաշնորգ Տեր Արմաշ եպիսկոպոս Նալբանդյանը։

Նա հավելել է, որ անորոշության պայմաններում հայերի մի մասը լքել է Սիրիան, մի մասը՝ դեպի Հայաստան, սակայն ժամանակի ընթացքում մարդիկ վերադարձել են իրենց տները։

Նալբանդյանը Սիրիայում տեղի ունեցածն անվանեց ոչ թե իշխանափոխություն, այլ ռեժիմի փոփոխություն:

Նրա խոսքով՝ սիրիական հասարակության մեջ կա ուրախություն ռեժիմի փոփոխության կապակցությամբ, բայց կա նաև անորոշություն, և շատերը հույս չունեն ապագայի հետ կապված։

Հոգևորականը պարզաբանեց, որ հայտնի չէ՝ նոր իշխանությունները վենդետաներ կիրականացնե՞ն նախորդ ռեժիմի ներկայացուցիչների նկատմամբ, թե՞ ոչ։

«Միևնույն ժամանակ մարդիկ աստիճանաբար հանդարտվում են, ինչի ցուցիչն է մեր եկեղեցում վերջերս կազմակերպված եկեղեցական արարողության ակտիվ հաճախումը։ Երկրում բացվել են նաև դպրոցները, այդ թվում՝ հայկական կրթական հաստատությունները»,- նշեց նա։

Նալբանդյանն ասաց, որ Սիրիայում դոլարը վերջին շրջանում արժեզրկվել է, ինչը բացասաբար է անդրադառնում արտաքին օգնություն ստացողների վրա։

«Միևնույն ժամանակ, հանրապետությունում դեռևս ոչ մի ձեռնարկություն չի գործում, իսկ միջազգային պատժամիջոցները դեռ չեն հանվել»,- ընդգծեց նա։

Հայ առաքելական եկեղեցու Դամասկոսի թեմի առաջնորդն ասել է, որ Գարեգին Բ Ամենայն Հայոց Կաթողիկոսը պատրաստակամություն է հայտնել մարդասիրական օգնություն ցուցաբերել Սիրիայի հայությանը։

Նա հիշեց, որ օրեր առաջ քրիստոնեական եկեղեցիների ներկայացուցիչների հանդիպում է տեղի ունեցել նոր ռեժիմի ներկայացուցչի հետ, ով իրեն ներկայացրել է որպես եկեղեցու և կրոնական համայնքների վարչության տնօրեն։

«Սա նոր մարմին է, մենք նախկինում ուղղակիորեն աշխատել ենք վարչապետի աշխատակազմի հետ: Մենք զգուշավոր ենք, թեև այս անձը մեզ վստահեցնում էր, որ ամեն ինչ լավ է լինելու և շատ խոստումներ տվեց։ Ի պատասխան որոշ հարցերի՝ նա հայտարարեց, որ անկարող է խոսել դրանց մասին՝ կոչ անելով դիմել կրոնական խորհրդին, որը կոչվում է Շուրա։ Սա մտահոգիչ է։ Ստացվում է, որ հիմա ամեն հարցի համար պետք է դիմենք իսլամական ուղղություն ունեցող խորհրդի՞ն։

Այս հանդիպումից հետո տեղի ունեցավ Դամասկոսում ներկայացված եկեղեցիների ղեկավարների հանդիպումը։ Հանդիպման մասնակիցները պայմանավորվել են ստեղծել հանձնաժողով, որը կարող է ներառել քաղաքական գործիչներ, գիտնականներ, իրավաբաններ, որպեսզի միասնական պահանջներ ձևավորվեն։

Պայմանավորվեցինք դեկտեմբերի 18-ին հանդիպում անցկացնել, համակարգել մեր գործողությունները և կապ հաստատել նոր կառավարության հետ։ Մենք ցանկանում ենք պահպանել մեր դերը Սիրիայում և չենք ցանկանում, որ մեզ փոքրամասնության կարգավիճակ տան։

Մենք ցանկանում ենք ցույց տալ, որ մենք սիրիական հասարակության անբաժանելի մասն ենք և ունենք մեր դերը Սիրիայի հիմնադիրների հետ հավասար: Եթե ​​նախկին ռեժիմը գնացել է, ուրեմն մենք ուզում ենք հասնել նաև Սահմանադրության փոփոխության, որն ունի թերություններ։ Սահմանադրության նոր տարբերակը պետք է արտացոլի դրույթներ, որոնք վերաբերում են քրիստոնեական համայնքի պաշտպանությանը և մեր իրավունքների պաշտպանությանը։ Դեռևս հայտնի չէ՝ դրան հասնել կհաջողվի՞, թե՞ ոչ»,- նշել է Նալբանդյանը։

Նա մատնանշեց Թուրքիայի կողմից հայատյաց քաղաքականության նշանները, որն իրականացվում է Անկարային ենթակա խմբերի կողմից։

Որպես օրինակ՝ Հայ առաքելական եկեղեցու Դամասկոսի թեմի առաջնորդը բերել է Դեյր էզ Զորի եկեղեցու պղծումը։

«Հատկանշական է նաև, որ դոլարի և սիրիական լիրայի հետ մեկտեղ ավելացել է թուրքական լիրայի շրջանառությունը։ Մտահոգության տեղիք է տալիս նաև սիրիական շուկայում թուրքական ապրանքների գերիշխող միտումը»,- ընդգծել է Նալբանդյանը։