«Հաղթանակ» տոնող երկրները դեռ չեն հասկանում, թե ինչ լրջագույն խնդրի առաջ են կանգնելու․ Գրիգոր Բալասանյան  

«Սիրիան չվերջացավ, Սիրիան նոր է սկսում»,- Yerevan.Today-ի հետ զրույցում հայտարարեց միջազգայնագետ Գրիգոր Բալասանյանը՝ անդրադառնալով այդ երկրում ծանր իրավիճակին։

«Աշխարհիկ Ասադի իշխանությունը երաշխավորում էր նաև իր հարևանների անվտանգությունը կրոնական առումով։ Խոսքը և՛ Թուրքիայի, և՛ Իսրայելի, և՛ Իրաքի, և՛ մյուս պետությունների մասին է։ Հիմա այնտեղ ստեղծված քաոսը տարբեր կրոնական խմբավորումների և ազգային փոքրամասնությունների, բոլորի պայքարը բոլորի դեմ հանգեցնելու է տարածաշրջանում նոր Աֆղանստանի ձևավորմանը։ Կարծում եմ՝ Սիրիան կրկնում է Լիբիայի ճակատագիրը՝ խնդիր դառնալով իր հարևանների համար։ Սիրիան դեռ նոր է սկսում և այն երկրները, ովքեր տոնում են իրենց «հաղթանակը»՝ Իսրայել, Թուրքիա, ԱՄՆ, դեռ չեն էլ հասկանում, թե ինչ լրջագույն խնդրի առաջ են կանգնելու և արդյո՞ք կկարողանան առհասարակ դուրս գալ այդ իրավիճակից, թե՞ ոչ»,- ասաց նա։ 

Միջազգայնագետի կարծիքով Ռուսաստանն ու Իրանը, որ այդքան տարիների ընթացքում հովանավորում էին Ասադի իշխանությանը, միտումնավոր չեն մասնակցել ռազմական գործողություններին։

«Իմիջային առումով Իրանը և Ռուսաստանը անկում ունեն, բայց նրանց չհաջողվեց ներքաշել սիրիական պատերազմի մեջ։ Այստեղ շատ կարևոր հանգամանք կա՝  ըստ էության, ինչպես  միջազգային լրատվամիջոցները գրում էին, 10 օր առաջ Դոհայում Ասադի հետ փորձում էին պայմանավորվել Միացյալ Նահանգներն ու Արաբական Էմիրությունները։ Արաբական պետությունների միջոցով Ասադին առաջարկվել էր կոմպրոմիսային տարբերակ․ ինքը սառեցնում է համագործակցությունը Իրանի և Հեզբոլլահի հետ, իրենք էլ դրա փոխարեն հանում են պատժամիջոցները։ Ըստ անգամ իրանական լրատվամիջոցների՝ Ասադը տվել էր այդ համաձայնությունը, դրանից հետո սկսվեց հարձակումը։ Տեսնելով սիրիական բանակի բարոյալքումը և իմանալով Ասադի այդ համաձայնության մասին՝ և՛ Ռուսաստանը, և՛ Իրանը, կարծում եմ, միտումնավոր չմասնակցեցին ռազմական գործողություններին, չնայած դրա հնարավորություններն ունեին։ Ե՛վ ռազմական բազաներ, և՛ ներուժ, ամեն ինչ էլ կար, ուղղակի իրենք չմտան այդ թակարդի մեջ, որ լարվել էր իրենց համար երկրորդ ճակատ բացելու հետ կապված»,- նշեց Բալասանյանը։

Այդուհանդերձ, տարածաշրջանը մեծ վտանգի առաջ է կանգնած։ Գրիգոր Բալասանյանը նաև նշեց, որ Թուրքիան այս պահին իրեն անպատիժ է զգում և հավելեց․ «Էրդողանը հայտարարել էր, որ մոտակա ամիսներին լուրջ իրադարձություններ են տեղի ունենալու։ Կարծում եմ՝ նաև Զանգեզուրի միջանցքի հետ է կապված։ Եթե մենք մեր քաղաքականության փոփոխություն չանենք և մինչ շտապ չկարգավորենք մեր խնդիրները մեր դաշնակիցների հետ, ապա չեմ բացառում, որ մոտ ապագայում Արարատյան դաշտում մենք կարող ենք մի օր առավոտյան տեսնել նույն ահաբեկիչներին, որոնք շատ հանկարծակի Թուրքիայից մտան Սիրիա։ Թուրքիայի ախորժակը բացվում է և նրանք ամեն ինչ անելու են Զանգեզուրի միջանցքը կտրելու և վերցնելու համար։ Հաշվի առնելով նաև Իրանի այս պահին իմիջային անկումը, հաշվարկը այն է լինելու, որ Փեզեշքիանը կարող է և չդիմադրել այնպես, ինչպես Ռայիսին կարող էր դիմադրել և ուղղակի հայտարարություններով սահմանափակվել՝ տեսնելով թե ինչպես են կտրում Զանգեզուրի միջանցքը, ռուսական զորքերն էլ այնտեղ չեն, ռուսական բոլոր ուղեկալները Հայաստանի պահանջով վաղուց հանվել են այնտեղից։ Այնտեղ դիմադրելու ուժ, ըստ էության, չի մնացել, հայկական բանակի հետ կապված էլ՝ հաշվի առնելով իրավիճակը, չեմ կարծում, թե կկարողանան կազմակերպել դիմադրություն։ Չնայած քաղաքական կամքի առկայության դեպքում կարելի է հետ շպրտել հակառակորդին, բայց այս իրավիճակում ես մի քիչ հոռետեսական եմ գնահատում դա, և վտանգը շատ մեծ է կախված Հայաստանի գլխին, մասնավորապես՝ Սյունիքի»։