8 մլն դոլար բառիս բուն իմաստով քամուն է տրվում․ Լիլիթ Գալստյան
Սիրելի հայրենակիցներ,
Որքան քաոտիկ և ողբերգական են մեր իրականությունն ու մեզ շրջապատող աշխարհքաղաքական զարգացումներն, այնքան սյուռեալիստական է և ոչ ադեկվատ իշխանության պահվածքը:
Բնականաբար, արժեզրկված չափանիշների, բացակա բարոյականության, համատարած ստի ու թերուս կառավարիչների միջավայրում գնալով խորանում է պարտության մատնված հասարակության ապատիան:
Այնքան են բթացել մեր հանրային ազդակները, որ որպես ընթացիկ իրողություն է ընկալվում քաղաքական մեծամասնության հերթական պատգամավորի թմրանյութի սկանդալը. Իսկ նա ոչ միայն չի հրաժարվում մանդատից, այլև շարունակում է հանրապետության երկրորդ քաղաքը ղեկավարելու հավակնություն ունենալ։
Այնքան են բթացել մեր հավաքական զգայարանները, որ հեծանիվ ու մետրո քարոզող պոպուլիստական թիմի 9 տոկոսանոց քաղաքապետը՝ հարաճուն արտաքին պարտքի պայմաններում, 17 հազար դոլարանոց տոմսով է մեկնում ԱՄՆ, այն պարագայում, երբ մայրաքաղաքը մատնված է տրանսպորտային կոլապսի:
Իշխանության քաղաքականության արդյունքում հայրենազրկված արցախահայության սոցիալական ծրագրերը կրճատող, թոշակ ու աշխատավարձ չբարձրացնող երկրում՝ բյուջեից 1,4 միլիոն դոլար է հատկացվում ամանորի հերթական անբովանդակ ծրագրին՝ երրորդ տարին անընդմեջ խոշտանգելով հանրապետական նշանակության հուշարձանը։
Հազար ու մի անվտանգային առաջնահերթություն ունեցող երկրում 8 մլն դոլար էլ բառիս բուն իմաստով քամուն է տրվում հանուն ինչ որ անպտուղ արբանյակային ծրագրի:
Հարկատուների հաշվին մի 6 միլիոն էլ թմրամիջոցների քարոզիչ Սնուպ Դոգի սիրույն եք քամուն տալիս և դարձյալ թողնում անհետևանք:
Կարևորը տեսարանն է, այն էլ՝ պատերազմի իրական սպառնալիքի ներքո:
Հռոմի Ստատուտը վավերացնելիս հայտարարում էիք, թե այն պատերազմական հանցագործ Ադրբեջանին պատասխանատվության ենթարկելու գործիք է:
Բաքվում Արևմտյան Ադրբեջանի հիմն են կատարում, մեջլիսում կազմակերպում են «Վերադարձ Արևմտյան Ադրբեջան» թեմայով լսումներ: Իսկ Արարատ Միրզոյանը երեկ խոսելով Հռոմի կանոնադրության անդամ երկների վեհաժողովում՝ բառ անգամ չի ասում Ադրբեջանի ցեղասպանական գործողությունների կամ ՀՀ- օկուպացիայի մասին:
Գալու է անձնական պատասխանատվության ժամանակը՝ կառավարության անդամներին նկատի ունենալով հայտարարեց Փաշինյանը:
Իսկ ով, եթե ոչ հենց ինքը՝ կառավարության ղեկավարն անձնապես պիտի պատասխան տա այն կործանարար սխալների համար, որոնք Արցախի կորուստ արժեցան, հազարավորների կյանք:
Մինչդեռ, այսօր այս ամբիոնից ծանր, պատմական ինքնախոստովանություն հնչեց. ԼՂՀ նկատմամբ վարվող քաղաքականությունը Հայաստանը պահելու և մեր պետականության գոյությունը երաշխավորելու միակ հնարավոր տարբերակն էր հայտարարեց Փաշինյանն: Ըստ էության արդարացնելով Ադրբեջանի ագրեսիան, ընդունեց նաև եղասպանության հանցակցությունը:
Իսկ աշխարհը, ցավոք, կշարունակի մեզ ընկալել որպես ազգ-նահատակ, քանի դեռ մեր պետականության ղեկին Նիկոլ Փաշինյանն է: