Կալիֆոռնիայում ձերբակալել են սեփական մահը բեմականացրած թմրաբարոնին

Գուտիերես-Օչոան 58-ամյա Նեմեսիո Օսեգերա-Սերվանտեսի փեսան է, որը նաև հայտնի է որպես «Էլ Մենչո», Խալիսկոյի «Նոր սերունդ» կարտելի առաջնորդը, որն, ըստ պաշտոնյաների, աշխարհում «ամենադաժան և թմրամիջոցների ապօրինի շրջանառության ամենաբեղմնավոր կազմակերպություններից մեկն է։

Արդարադատության դեպարտամենտի բարձրաստիճան պաշտոնյա Նիկոլ Արջենտիերին հայտարարել է, որ նա «ենթադրաբար ուղղորդել է տոննաներով մետամֆետամինի և կոկաինի ներմուծումը Միացյալ Նահանգներ և մասնակցել է բռնություններին՝ օգնելու համար կարտելի հանցավոր գործունեությանը»:

Գլխավոր դատախազի տեղակալ Լիզա Մոնակոն պատմել է, որ Գուտիերես-Օչոան «ենթադրաբար բեմականացրել է իր մահը և կեղծ անուն է վերցրել՝ արդարադատությունից խուսափելու և Կալիֆորնիայում շքեղ կյանքով ապրելու նպատակով»:

Ըստ դատական ​​փաստաթղթերի՝ Գուտիերես-Օչոան 2014 թվականին սկսել է աշխատել «Խալիսկո» կարտելում և համակարգել է Միացյալ Նահանգներ 40 հազար կիլոգրամ մետամֆետամինի և 2000 կիլոգրամ կոկաինի առաքումը Մեքսիկայից։

2021 թվականին նա առևանգել է Մեքսիկայի ռազմածովային ուժերի երկու անդամների՝ փորձելով ապահովել Օսեգերա-Սերվանտեսի կնոջ ազատ արձակումը, որին ձերբակալել էին Մեքսիկայի իշխանությունները։

«Խալիսկո» կարտելի հիմնադիր Օսեգերա-Սերվանտեսին Միացյալ Նահանգներում ևս մեղադրանքներ են առաջադրվել, և Պետքարտուղարությունը նրան բռնելու համար 10 միլիոն դոլար պարգև է առաջարկել: