Զույգը 57 տարվա ամուսնությունից հետո գտել է իրենց հարսանիքի կորած տեսանյութը

Ավստրալացի զույգը ֆեյսբուքյան գրառման շնորհիվ 57 տարի անց գտել է իրենց շոտլանդական հարսանիքի վաղուց կորած տեսանյութը։

Աբերդինի բնակիչ Թերի Չեյնը պատմել է, որ տարիների ընթացքում Super 8 կինոժապավենի վրա ֆիլմերի մեծ հավաքածու է հավաքել, որոնց մեծ մասը ինքն է նկարահանել, բայց երբ այս տարվա ապրիլին որոշել է իր հավաքածուն DVD-ի փոխանցել, պարզել է, որ ժապավեններից մեկի վրա նկարահանված է իրեն անծանոթ երկու մարդու  հարսանիքը։  

Նա հին ժապավեններից մեկից կադր է տեղադրել ֆեյսբուքի տեղական խմբում, սակայն վեց ամիս անցավ, բայց զույգի ինքնության մասին տեղեկություններ այդպես էլ չեղան:

Վերջերս այս լուսանկարը տեղադրվել է Աբերդինի Մաստրիկ շրջանի բնակիչների խմբում և դրան ուշադրություն է դարձրել Էյլին Թերնբուլը:

77-ամյա Թերնբուլը, որն ապրում է Ավստրալիայի Բրիսբեն քաղաքում, պատմել է, որ ընդամենը հինգ րոպե է  Facebook-ի խմբի մասնակից եղել, երբ տեսել է իր հարսանեկան լուսանկարը:

«Ես զննում էի Ֆեյսբուքը և հանդիպեցի այս հարսանեկան լուսանկարին: Ամուսինս նստած էր այստեղ, և ես շրջվեցի նրա կողմն ու ասացի. «Ահա մեր հարսանեկան լուսանկարը», - պատմել է նա BBC Scotland-ին: