Նմանը չունեցող ռուսական «նոու-հաուն» արդյունավետ է եղել մարտի դաշտում․ Պուտին

Սպառազինությունների ոլորտում ռուսաստանյան բազմաթիվ «նոու-հաուներ», որոնք նմանը չունեն, արդեն ապացուցել են իրենց արդյունավետությունը ռազմի դաշտում։ Այս մասին հայտարարել է ՌԴ նախագահ Վլադիմիր Պուտինը «Բանակ–2024» համաժողովի մասնակիցներին ուղղված տեսաուղերձում:

Պուտինն ընդգծել է, որ համաժողովում ծավալվել է ռուսական պաշտպանական արդյունաբերության առաջատար, շատ առումներով` եզակի ձեռքբերումների, համաշխարհային ճանաչում ունեցող առաջատար կորպորացիաների մասշտաբային ներկայացում: Միայն սպառազինության, տարբեր ռազմական և հատուկ տեխնիկայի արտահանման նմուշների ավելի քան 240 նմուշ է ներկայացված։

«Ընդգծեմ, որ հայրենական շատ նմանը չունեցող նորարարական լուծումներ արդեն իսկ ապացուցել են իրենց արդյունավետությունը ռազմի դաշտում։ Ավելին, դրանց հիմնական բնութագրերը անընդհատ կատարելագործվում են: Պաշտպանական գործարանների կոնստրուկտորների, ինժեներների, գիտնականների, աշխատանքային կոլեկտիվների աշխատանքը ակտիվորեն շարունակվում է՝ հաշվի առնելով հատուկ ռազմական գործողության ընթացքում ձեռք բերված մարտական փորձը»,- ասել է Պուտինը։

Նա վստահություն է հայտնել, որ «Բանակ» համաժողովի արդյունքներով ՊՆ-ն և ռազմարդյունաբերական համալիրի ձեռնարկությունները շահավետ պայմանագրեր կկնքեն, իսկ անվտանգության ապահովման գործում բարեկամ երկրների հետ գործակցությունն էլ ավելի արդյունավետ կդառնա:

Պուտինը նշել է, որ Ռուսաստանը պատրաստ է արտասահմանյան գործընկերների հետ զարգացնել աշխարհում միասնական անվտանգության համակարգը: Նա նշել է, որ տասնյակ երկրներ ներկայացուցչական պատվիրակություններ են ուղարկել համաժողովին մասնակցելու համար, հայտարարվել է ավելի քան 120 ընկերության մասնակցություն, իսկ «Բանակ-2024»-ի հարթակում կլինի մի քանի արտասահմանյան ցուցադրություն:

«Բանակ-2024» ֆորումը բացվել է «Պատրիոտ» ցուցահանդեսային կենտրոնում և կանցկացվի օգոստոսի 12-14-ը։ Ցուցադրությունների ընդհանուր մակերեսը կկազմի ավելի քան 340 հազար քմ: «Բանակ-2024» համաժողովին մասնակցում են պատվիրակություններ 83 պետություններից։