Պակիստանի դատարանը կալանավորել է նախկին վարչապետին և նրա կնոջը

Պակիստանի դատարանը նախկին վարչապետ Իմրան Խանին և նրա կնոջը՝ Բուշրա Բիբիին, նոր մեղադրանքների հիման վրա կալանավորել է մինչև հուլիսի 22-ը: Նրանք մեղադրվում են ենթադրաբար «պաշտոնը չարաշահելու՝ Տոշախանա նահանգի գանձարանից նվերներ ձեռք բերելու համար», հաղորդում է ՌԻԱ «Նովոստի»-ն:

Պակիստանի ազգային հաշվետվողականության բյուրոն՝ Պակիստանի հակակոռուպցիոն վարչությունը, նոր մեղադրանք է ներկայացրել շաբաթ օրը:

«Դատարանը հանձնարարել է Ազգային հաշվետվողականության բյուրոյին հարցաքննել Ադիալայի բանտում գտնվող երկու կասկածյալներին, ինչպես նաև հանձնարարել է ամուսիններին հուլիսի 22-ին ներկայանալ դատարան», - հաղորդում է հեռուստաալիքը:

Իր հերթին, նախկին վարչապետի և նրա տիկնոջ փաստաբանն ասել է, որ այս կալանքն անօրինական է, հավելելով, որ գրավի վերաբերյալ իրենց դիմումն արդեն քննարկվում է Գերագույն դատարանում։

Իմրան Խանը, որը ղեկավարել է Պակիստանի կառավարությունը 2018-ից 2022 թվականներին, պաշտոնանկ է արվել 2022 թվականի ապրիլի 10-ին՝ իրեն անվստահություն հայտնելու քվեի արդյունքում։

2023 թվականի օգոստոսին Խանը ձերբակալվել է Տոշախանայի պետական գանձարանում պահվող թանկարժեք իրերի վաճառքի հետ կապված խարդախության գործի հետ։ Հետագայում նրան մի շարք մեղադրանքներ են առաջադրվել, այդ թվում՝ պետական դավաճանության վերաբերյալ՝ կապված գաղտնի հեռագրի տարածման հետ։ Խանի կողմից ներկայացված վերաքննիչ բողոքների քննարկման ընթացքում նրան առաջադրված մեղադրանքների մեծ մասը հանվել է:

Սակայն փետրվարին Խանը և նրա կինը մեղավոր են ճանաչվել և դատապարտվել յոթ տարվա ազատազրկման՝ կապված անօրինական ամուսնության հետ: Ըստ մեղադրող կողմի՝ նրանք ամուսնացել են իդդատի ժամանակաշրջանում, ինչը հակասում է շարիաթի օրենքներին: Ըստ դրանց՝ տվյալ ժամանակաշրջանում կինը, ամուսնու մահից կամ ամուսնալուծությունից հետո, չի կարող ամուսնանալ այլ տղամարդու հետ:

Ավելի ուշ դատարանն ամուսիններին արդարացրել էր, և նրանք արդեբն պետք է դուրս գային, սակայն նոր մեղադրանքների պատճառով կշարունակեն մնալ կալանքի տակ: