Aurus մեքենա, ծովակալի դաշույն և թեյախմության համար սպասք. հայտնի է՝ ինչ է Պուտինը նվիրել Կիմ Չեն Ընին

ՌԴ նախագահ Վլադիմիր Պուտինը Հյուսիսային Կորեա կատարած այցի ընթացքում նվերներով է փոխանակվել Հյուսիսային Կորեայի ղեկավար Կիմ Չեն Ընի հետ։ ՌԴ նախագահի օգնական Յուրի Ուշակովը հայտնել է, որ Պուտինը Կիմ Չեն Ընին նվիրել է նոր Aurus մեքենա, ծովակալի դաշույն և թեյախմության համար սպասք։

«Նվերներով արդեն փոխանակվել ենք։ Aurus մեքենա ենք տվել... ծովակալի դաշույն, թեյախմության համար շատ գեղեցիկ սպասք»,- ՏԱՍՍ-ի լրագրողներին ասել է Ուշակովը։

Նա չի ասել, թե կոնկրետ ինչ է նվիրել Կիմ Չեն Ընը Պուտինին։ Ուշակովի խոսքով՝ այդ նվերները «լավն են», և «ասոցացվում են նախագահի կերպարի հետ»։

Նշվում է, որ Պուտինը Կիմ Չեն Ընին առաջին Aurus-ը նվիրել էր 2024 թվականի փետրվարին։ ԿԺԴՀ առաջնորդը դարձել էր առաջին օտարերկրյա ղեկավարը, որը նվեր է ստացել այս մեքենան։ Aurus-ի սերիական արտադրությունը մեկնարկել է 2021 թվականին, դրա արժեքը սկսվում է 37 միլիոն ռուբլուց։