Հաքերները կոտրել են Christie's աճուրդի կայքը և աճուրդի մեծահարուստ հաճախորդների մասին գաղտնի տեղեկություններ կորզել

Հաքերային RansomHub հորջորջվող խումբը ստանձնել է Christie's աճուրդի կայքում կիբերհարձակման պատասխանատվությունը և սպառնում է աճուրդի հաճախորդների մասին խիստ գաղտնի անձնական տեղեկություններ հրապարակել:

Մայիսի սկզբին կատարված հարձակումը աճուրդի տանը ստիպեց մայիսի 9-ին փակել իր հիմնական կայքը, որից հետո 10 օր, ընդհուպ՝ գարնանային իսպառ վաճառքի ժամանակ այն անհասանելի մնաց։

Ըստ New York Times-ի՝ հաքերային RansomHub-ը երկուշաբթի ստվերային DarkNet ցանցում տեղեկություն է հրապարակել՝ նշելով, որ իրենց հասանելի են դարձել աշխարհի արվեստի ստեղծագործությունների ամենահարուստ հավաքորդների վերաբերյալ գաղտնի տեղեկությունները՝ միաժամանակ ոմանց անուններն ու ծննդյան տարեթվերը հանրային սեփականություն դարձնելով:

Թեև New York Times-ի չկարողացավ հաստատել հաքերային խմբի պնդումները, կիբերանվտանգության մի քանի փորձագետներ հայտարարել են, որ նրանք հայտնի դրամաշորթներ են և որ նրանց պնդումները արժանահավատ են: Ransomhub-ը նաև սպառնացել է տվյալները հրապարակել մայիսի վերջին, և որ Christie's-ը չի կարողացել վճարել սկզբում պահանջված փրկագինը:

Christie's-ի խոսնակը Artsy կայքին տված հայտարարության մեջ հաստատել է, որ աճուրդի տունն այս ամսվա սկզբին բախվել է անվտանգությանն առնչվող տեխնոլոգիական միջադեպի և անհապաղ գործողություններ է ձեռնարկել՝ իր համակարգերը պաշտպանելու, ներառյալ իր վեբկայքը ավտոնոմ ռեժիմի փոխադրելու համար:

Աճուրդի տան ներկայացուցիչները հավելել են, որ Christie's-ը ներկայում ծանուցում է մասնավոր կյանքի գաղտնիության կարգավորող մարմիններին և կառավարական ​​հաստատություններին: Նշվում է նաև, որ իրենք շուտով կկապվեն տուժած հաճախորդների հետ: