Իսպանիայում ձերբակալել են հայտնի ֆուտբոլիստների տները թալանած գողերին

Իսպանիայի ազգային ոստիկանությունը հայտնաբերել է հայտնի ֆուտբոլիստների տներում գողություններ կատարած հանցավոր խմբին, այդ մասին հաղորդագրություն է տարածել ոստիկանության մամուլի ծառայությունը։

Ձերբակալվածները 6-ն են, նրանք 2022 թվականի հուլիսից սկսած՝ 8 կողոպուտ են իրականացրել էլիտար բնակելի համալիրներում, որտեղ ապրում են հայտնի ֆուտբոլիստներ։

Գողերը թիրախներին ընտրել են՝ ուսումնասիրելով նրանց սոցցանցերի էջերը, ֆուտբոլիստների ընտանիքների անդամների հրապարակած լուսանկարները, տեսանյութերը։

Միայն Մադրիդում 2023-ի մայիսին կատարած մեկ գողության արդյունքում գողերը կես միլիոն եվրոյի վնաս են հասցրել տանտիրոջը։ Թեպետ ոստիկանությունը չի հրապարակել կողոպտիչներից տուժած մարզիկների անունները, սակայն հայտնի է, որ նշված ժամանակաշրջանում թալանել էին «Ռեալ Մադրիդի» հարձակվող Ռոդրիգոյի առանձնատունը։