Նորվեգիայում երկու տղա միջնադարյան գանձեր են հայտնաբերել և դրանք ցույց տվել հնագետներին միայն 60 տարի անց

Նորվեգիայում երկու տղաներ որոշել են զբաղվել գանձերի որոնմամբ: Նրանք կարծել են, որ տեղի եկեղեցին հարմար տեղ է պեղումների համար և սողոսկել շենքի տակ։ Փորելով ցեխակույտը՝ տղաները մի քանի արծաթե մետաղադրամ են հայտնաբերել։ Դա տեղի է ունեցել 1964 թվականին:

Յան Գունար Ֆուգելսնեսն ասել է, որ այդ ժամանակ ինքը և իր եղբայրը չեն հասկացել իրենց գտածոյի նշանակությունը։ Բայց գանձը գանձ է, ուստի մետաղադրամները փաթեթավորել են տուփի մեջ և պահել: Վաթսուն տարի անց հնագետներն առաջին անգամ դիտարկեցին տղաների գտածոն, ասվում է Մյորի և Ռոմսդալի քաղաքապետարանի հայտարարության մեջ:

Ֆուգելսնեսը դեռևս ապրում է այդ տարածքում և հնագետներին պատմել է մետաղադրամների մասին այն բանից հետո, երբ հետազոտություններ են սկսվել Էդոյի եկեղեցում, որտեղ տղաները գտել են գանձերը: Պարզվել է, որ 14 արծաթյա մետաղադրամների հավաքածուն աներևակայելի հազվագյուտ 600-ամյա արտեֆակտ է, ասել է հնագետ Կարլ Ֆրեդրիկ Ուահր-Հանսեն Վեմմեստադը: Մետաղադրամների մեծ մասը թվագրվում է 1300-1350-ական թվականներին, սակայն մեկ մետաղադրամը թվագրվում է 1450-1481 թվականներին, ասում են մասնագետները: Մի քանի մետաղադրամներ դրոշմված են թագերով։

Այս տեսակի միայն մի քանի մետաղադրամ է հայտնաբերվել Կենտրոնական Նորվեգիայում, ասվում է Վեմմեստադի հաղորդագրության մեջ: Մետաղադրամների տարիքը և գտնվելու վայրը հուշում են, որ դրանք միջնադարում Էդյոյի եկեղեցու տակ գտնվող հողաթմբի մի մասն են եղել։ Ըստ քաղաքապետարանի՝ եկեղեցու տակ գտնվող տարածքը փորվել է գերմանական զորքերի կողմից և օգտագործվել է Երկրորդ համաշխարհային պատերազմի ժամանակ զինամթերք պահելու համար։

Ֆուգելսնեսն ու նրա եղբայրը նաև ինը ասեղ, երեք մետաղական կտոր և սաթի մարգարիտ են գտել եկեղեցու տակ, ասել է նա հետազոտողներին:

Հնագետներն ուլունքը նույնականացրել են որպես աղոթքի ուլունքաշարի մաս, իսկ 700-ամյա ասեղները՝ որպես հանգուցյալի հագուստի մաս: Վաթսունյոթամյա Ֆուգելսնեսը հազվագյուտ մետաղադրամները տվել է հնագետներին, հայտնում է NRK նորվեգական հրատարակությունը։ Արտեֆակտներն ուղարկվել են թանգարան՝ հետագա հետազոտման համար: