«Հաց բերողին» ազատ արձակելու պահանջով բողոքի երթ (Տեսանյութ)

Ազատության հրապարակից երթ է մեկնարկել դեպի Գլխավոր դատախազություն՝ Արթուր Սարգսյանին (Հաց բերող) ազատ արձակելու պահանջով։

Ակցիային մասնակցում են նաև «Օհանյան–Րաֆֆի–Օսկանյան» դաշինքի մաս կազմող ՀԱՄԱԽՄԲՈՒՄ կուսակցության վարչության անդամ Գեղամ Նազարյանը, Երիտասարդական միության նախագահ Աղվան Պողոսյանը և երիտթևի մի շարք այլ կուսակցականներ, ինչպես նաև «Ժառանգություն» կուսակցության փոխնախագահ Արմեն Մարտիրոսյանը, այդ կուսակցության վարչության անդամներ Սուսաննա Մուրադյանը և Հովսեփ Ղազարյանը։

«7օր»–ի հետ զրույցում Գեղամ Նազարյանը հիշեցրել է, որ ՀԱՄԱԽՄԲՈՒՄ կուսակցության 5 պատգամավորները պատրաստակամություն էին հայտնել հանդես գալ որպես անձնական երաշխավորներ Արթուր Սարգսյանի կալանքը խափանման միջոց չկիրառելու համար:

–Խստորեն դատապարտում ենք դատարանի որոշումը՝ այն համարելով անընդունելի և անմարդկային: Կոչ ենք անում ԱԺ պատգամավորներին, իրավապաշտպան կազմակերպություններին ուշադրության կենտրոնում պահել խնդիրը,–հավելել է Գ. Նազարյանը:

***
Գլխավոր դատախազությունից հետո երթի մասնակիցները շարժվել են Դատապարտյալների հիվանդանոց, որտեղ այս պահին գտնվում է Արթուր Սարգսյանը։ Այնտեղ է նաև ԱԺ պատգամավոր, Մարդու իրավունքների պաշտպանության մշտական հանձնաժողովի նախագահ, «Համախմբում» կուսակցության փոխնախագահ Էլինար Վարդանյանը։

Երթի մասնակիցները հիվանդանոցի ներկայացուցիչներին հաց են փոխանցել, որպեսզի նրանք գիտակցեն և գնահատեն հացի արժեքը։

7or.am