Իսրայելի կառավարությունը բանաձև է ընդունել, որով մերժում է Պաղեստինի ճանաչման «թելադրանքը»

Իսրայելի կառավարությունն իր ամենշաբաթյա հանդիպման ժամանակ միաձայն հավանություն է տվել վարչապետ Բենիամին Նաթանյահուի կողմից ներկայացված բանաձևին, որը մերժում է միջազգային հանրության «թելադրանքը» պաղեստինցիների հետ կարգավորման վերջնական կարգավիճակի և պաղեստինյան պետության ճանաչման վերաբերյալ։ Այս մասին հայտնել է նախարարների կաբինետի ղեկավարի գրասենյակը, տեղեկացնում է ՏԱՍՍ-ը։

«Կառավարությունը միաձայն հավանություն է տվել միջազգային թելադրանքին Իսրայելի անհամաձայնության մասին հռչակագրային որոշմանը»,- ասվում է հաղորդման մեջ։

Ավելի վաղ Իսրայելի վարչապետ Բենիամին Նաթանյահուի ներկայացրած Իսրայելի կաբինետի «հռչակագրային որոշման» նախագծում հաղորդվում էր, որ Իսրայելն ամբողջությամբ մերժում է պաղեստինցիների հետ կարգավորման համաձայնագրի և Պաղեստին պետության միակողմանի ճանաչման վերաբերյալ միջազգային թելադրանքը։

«Իսրայելը կտրականապես մերժում է պաղեստինցիների հետ մշտական ​​համաձայնության վերաբերյալ միջազգային թելադրանքը։ Իսրայելը կշարունակի հանդես գալ պաղեստինյան պետության միակողմանի ճանաչման դեմ»,- ասվում է նախագծում։

«Միջազգային հանրության վերջին քննարկումների լույսի ներքո՝ կապված Իսրայելին պաղեստինյան պետություն միակողմանիորեն պարտադրելու փորձի հետ, ես այսօր կառավարության հաստատմանն եմ ներկայացնում այս հարցի վերաբերյալ հռչակագրային որոշում: Վստահ եմ, որ այն կստանա ամենալայն աջակցությունը»,- ասել է Նաթանյահուն կառավարության նիստի սկզբում։