Իսլանդիայում վերջին մի քանի օրում հազարավոր երկրաշարժեր են գրանցվել. փորձագետները կանխատեսում են հզոր հրաբխային ժայթքում (տեսանյութ)

Վերջին մի քանի օրերում Իսլանդիայում մի քանի հազարի ստորգետնյա ցնցում է գրանցվել, ինչը կարող է վկայել Ֆագրադալսֆյադլ հրաբխի սպասվող ժայթքման մասին: Մասնավորապես Ռեյկյանես թերակղզու հարավ-արևմուտքում անցած օրվա ընթացքում ավելի քան 500 երկրաշարժ է գրանցվել. այժմ փորձագետները կանխատեսում են հզոր հրաբխային ժայթքում:

Ինչպես նշում է Daily Mail-ը, ստեղծված իրավիճակի ֆոնին հայտարարվել է արտակարգ դրություն, 4,000 բնակչի կարգադրվել է լքել Գրինդավիկ քաղաքը: Տարհանված բնակիչները հայտնել են, որ ստորգետնյա ցնցումների պատճառով ծովախտին բնորոշ տհաճ զգացողություններ են ունեցել, ինչպես նաև գետնի տակից «արտասովոր ձայներ» են լսել:

Քաղաքի տարբեր հատվածներում առաջացել են ահռելի ճեղքեր ու փոսեր, որոնցից ծուխ է բարձրանում:

Իշխանությունները շտապ պատրաստվում են պաշտպանական արգելապատնեշներ կառուցել մոտակա երկրաջերմային էլեկտրակայանի շուրջ՝ հույս ունենալով այն պաշտպանել լավայի հավանական հոսքերից: Նշվում է , որ էլեկտրակայանը Գրինդավիկ քաղաքից ընդամենը վեց կիլոմետր հեռավորության վրա է:

Տեղական լրատվամիջոցները հայտնում են, որ անցած գիշերվա ընթացքում սեյսմիկ ակտիվությունը նման է եղել նախորդ օրվան՝ «ժամում մոտ հարյուր ցնցում»:

Ըստ Visir.is-ի, ցնցումների մեծ մասը թույլ է եղել: