Պատրուշևը գտնում է, որ Երևանի և Բաքվի միջև կարգավորումը հնարավոր է միայն արտատարածաշրջանային ուժերի չմիջամտության դեպքում

Ադրբեջանի և Հայաստանի միջև կարգավորումը հնարավոր է միայն այն դեպքում, երբ արտատարածաշրջանային ուժերը դադարեն միջամտել հակամարտությանը, հայտարարել է ՌԴ Անվտանգության խորհրդի քարտուղար Նիկոլայ Պատրուշևը Մոսկվայում ԱՊՀ գործընկերների հետ հանդիպման ժամանակ։ Նրա խոսքերը մեջբերում է ՏԱՍՍ-ը։

«Մենք շահագրգռված ենք նաև հարավկովկասյան տարածաշրջանում իրավիճակի կայունացմամբ, դրա զարգացման համար պայմաններ ստեղծելու և փոխադարձ վստահության ու համագործակցության ամրապնդմամբ»,- վստահեցրել է Պատրուշևը։ Նրա խոսքով՝ Ռուսաստանը հետևողական քայլեր է ձեռնարկում հայ-ադրբեջանական հարաբերությունների համապարփակ կարգավորման ուղղությամբ՝ ի շահ այդ երկրների միջև խաղաղության պայմանագրի կնքման, սահմանների սահմանազատման և տրանսպորտային հաղորդակցությունների բացման։

«Պրակտիկան ցույց է տալիս, որ դա հնարավոր է միայն արտատարածաշրջանային ուժերի չմիջամտելու դեպքում: Արևմտյան երկրների գործողությունները տարածաշրջանում հրահրում են իրավիճակի հետընթաց և նպաստում դրանում հակասությունների պահպանմանը»,- ասել է ՌԴ Անվտանգության խորհրդի քարտուղարը։