Իսրայելը գաղտնի օգնել է Ադրբեջանին Արցախը «վերադարձնելու» համար

Իսրայելը զենքով գաղտնի օգնել է Ադրբեջանին Արցախը վերադարձնելու համար։ Այս մասին հայտնի է դարձել AP News-ին։

«Մեզ համար լուրջ խնդիր է այն, որ իսրայելական զենքը կրակում է մեր ժողովրդի վրա։ Ես չեմ հասկանում, թե ինչու Իսրայելը չի կարող գոնե ինչ-որ մտահոգություն հայտնել այն մարդկանց ճակատագրի հարցում, որոնք արտաքսվել են իրենց հայրենիքից»,- գործակալությանն ասել է Իսրայելում Հայաստանի դեսպան Արման Հակոբյանը։

Ադրբեջանի ռազմական գործողությունն սկսվելուց առաջ ընդամենը մի քանի շաբաթում ռազմական բեռնատար ինքնաթիռները բազմիցս թռել են Իսրայելի հարավային ավիաբազայի եւ Արցախից ոչ հեռու գտնվող օդանավակայանի միջեւ, վկայում են թռիչքների հսկման տվյալները եւ հայ դիվանագետները։ Այդ թռիչքները տագնապեցրել են պաշտոնյաներին Երեւանում, որոնք երկար ժամանակ զգուշանում էին Իսրայելի եւ Ադրբեջանի միջեւ դաշինքից, ասված է հրապարակման մեջ։

Իսրայելի արտաքին գործերի եւ պաշտպանության նախարարությունները հրաժարվել են մեկնաբանել Արցախում իսրայելական զենքի օգտագործումը կամ Հայաստանի անհանգստությունն Ադրբեջանի հետ նրա գործընկերության առիթով։

Փորձագետների գնահատմամբ՝ 2016-2020թթ. Իսայելը Ադրբեջան է մատակարարել իր զինանոցի մոտ 70 տոկոսը, ինչն Ադրբեջանին գերազանցություն է ապահովել Հայաստանի նկատմամբ եւ խթանել Իսրայելի խոշոր պաշտպանական արդյունաբերությունը։

«Իսրայելական զենքը շատ կարեւոր դեր է խաղացել՝ թույլ տալով ադրբեջանական բանակին հասնել իր նպատակներին»,- ասել է Ստոկհոլմի խաղաղության խնդիրների հետազոտության միջազգային ինստիտուտի ավագ գիտաշխատող Փիտեր Վեզեմանը, որը զբաղվում է զենքի վաճառքի հարցով։

Վեզեմանի խոսքով՝ իսրայելական մեծ հեռահարության հրթիռները եւ պայթող դրոնները փոխհատուցում են Ադրբեջանի ոչ մեծ ռազմաօդային ուժերը, անգամ երբեմն հարվածներ հասցնելով հենց Հայաստանի տարածքում։ Իսրայելական «երկիր-օդ» դասի «Բարաք-8» հրթիռները պաշտպանում են Ադրբեջանի օդային տարածքը՝ խփելով հրթիռներն ու անօդաչուները, ավելացրել է նա։

Անցած ամիս հարձակումից ոչ շատ առաջ Ադրբեջանի պաշտպանության նախարարությունը հայտարարել էր, որ բանակը փորձարկել է «Բարաք-8» հրթիռները։ Դրանք ստեղծած Israel Aerospace Industries ընկերությունը հրաժարվել է մեկնաբանել Ադրբեջանի կողմից իր ՀՕՊ համակարգերի եւ մարտական դրոնների օգտագործումը։

«Մենք ուրախ ենք այդ համագործակցության համար, այն բավական բարեհաջող էր եւ օգտակար պաշտպանության համար»,- AP գործակալությանն ասել է Իսրայելում Ադրբեջանի դեսպան Մուխթար Մամեդովը՝ խոսելով ադրբեջանական զինված ուժերին Իսրայելի աջակցության մասին։ «Մենք դա չենք թաքցնում»։