«Տարբեր կողմերից պայթյունի ձայներ եմ լսում, ուժեղ հրետանի է աշխատում, մարդիկ նկուղներ են իջել»․ արցախցի լրագրող

Ադրբեջանը կեղծ ահաբեկչական մեղադրանքը հնչեցնելով Արցախի հասցեին, այս պահին տարբեր ռազմական օբյեկտների ուղղությամբ, տարբեր միջոցներով, զինատեսակներով կրակ է բացել, Ֆեյսբուքում գրել է «Պատիվ ունեմ» խմբակցության պատգամավոր Տիգրան Աբրահամյանը։

Ըստ Աբրահամյանի՝ առաջնահերթ թիրախներ են ընտրվել, որոնք այս պահին կրակի տակ են:

«Այս պահին հստակ չի, թե քաղաքացիական օբյեկտները ևս թիրախավորվում ե՞ն, թե՞ ոչ, բայց հարվածները շարունակվում են», - գրել է ընդդիմադիր պատգամավորը:

Կրակոցների մասին «Ազատությանը» փոխանցեց նաև արցախցի անկախ լրագրող Մարութ Վանյանը։

«Այս պահին պայթյունի ձայներ են Ստեփանակերտում լսվում, երեխեքը, ծնողները․․․ ճիչերով րոպե առաջ իջել ենք, նկուղում ենք։ Շուշիի կողմից, իմ պատշգամբից տարբեր կողմերից պայթյունի ձայներ եմ լսում, առաջին պայթյունների ձայները շատ մոտիկից էին լսվում, ձայները չեն դադարում։ Ուժեղ հրետանի է աշխատում, անդադար կրակոցներ են», - ասաց Վանյանը՝ նշելով, որ Ստեփանակերտում օդային տագնապ է միացել։

Ստեփանակերտի մեկ այլ բնակիչ էլ «Ազատությանը» փոխանցեց, որ Շուշիի կողմից դեպի Ստեփանակերտ են խփում, իր երեխեքը մանկապարտեզում են, ինքն էլ մնացել է ճանապահին կանգնած։

«Պատերազմ է, ավելի ահավոր պատերազմ քան՝ սեպտեբերի 27-ին»

Պատերազմ է, ավելի ահավոր պատերազմ քան՝ սեպտեբերի 27-ին, «Ազատությանը» փոխանցեց Արցախի Ազգային ժողովի ընդդիմադիր «Արդարություն» խմբակցության քարտուղար Մետաքսե Հակոբյանը։

«Ամբողջ Ստեփանակերտը ռմբակոծում են՝ բոլոր կողմերից, մարդիկ իրենց երեխեքին կոցրել են, երեխեքը՝ իրենց ծնողներին, սարսափելի վիճակ է, մի կաթիլ բենզին չկա, որ գնան գտնեն երեխաներին», - ասաց պատգամավորը։

«Ալիևի ցեղասպան ռեժիմը սկսեց արցախցիների ցեղասպանության արյունալի փուլը»

«Ալիևի ցեղասպան ռեժիմը տևական սովից հետո սկսեց արցախցիների ցեղասպանության արյունալի փուլը, X-ում գրել է Արցախի նախկին պետնախարարի խորհրդական Արտակ Բեգլարյանը։

«Սրանք են ձեր իրավունքների ու անվտանգության երաշխիքները՝ Ռուսաստան, ԱՄՆ, ԵՄ», - եզրափակել է Բեգլարյանը։

Հայաստանի պաշտպանության նախարարությունը հաղորդում է, որ ժամը 14:00-ի դրությամբ իրադրությունը Հայաստանի սահմաններին հարաբերականորեն կայուն է։

Բաքուն հայտարարում է՝ Ղարաբաղում «հակաահաբեկչական գործողություններ» է սկսկում

Ադրբեջանի պաշտպանության նախարարությունը քիչ առաջ հայտարարել է, որ Ղարաբաղում «հակաահաբեկչական գործողություններ» է սկսկում, այդ թվում՝ «վերականգնելու Ադրբեջանի հանրապետության սահմանադրական կարգը»։

«Ղարաբաղի տնտեսական տարածաշրջանում լայնածավալ սադրանքները ճնշելու, հայկական զինված ուժերի զինաթափումն ու մեր տարածքներից դուրսբերումը, ռազմական ենթակառուցվածքները չեզոքացնելու, օկուպացիայից ազատագրված տարածքներ վերադարձող քաղաքացիական բնակչության, շինարարական վերականգնողական աշխատանքներում ներգրավված քաղաքացիական ծառայողների և մեր զինվորականների անվտանգությունն ապահովելու, ինչպես նաև Ադրբեջանի հանրապետության սահմանադրական կարգը վերականգնելու նպատակով, տարածաշրջանում սկսվել են տեղական բնույթի հակաահաբեկչական միջոցառումներ»,- ասված է Ադրբեջանի ՊՆ-ի հայտարարությունում։

Բաքուն նշում է, որ ադրբեջանական կողմը իր գործողությունների մասին տեղեկացրել է Ռուսաստանի Դաշնության խաղաղապահ զորախմբի հրամանատարությունը և թուրք-ռուսական դիտորդական կենտրոնի ղեկավարությունը։

Համցանցում մեծ արագությամբ Ստեփանակերտից կադրեր են տարածվում։