Լիբանանահայությունը արցախյան զորակցության օր է հայտարարել. Հակոբ Հավաթյանը` սատարման ակցիաների մասին

Լիբանանահայերը, ի զորակցություն Արցախի, այսօր առավոտյան երթ են իրականացրել, ապա խորհրդանշական կերպով ստորագրել Արցախի դրոշի վրա։

Այս մասին Alpha News-ի ուղիղ եթերում հայտարարել է ՀՅԴ Լիբանանի կենտրոնական կոմիտեի հանրային կապերի պատասխանատու Հակոբ Հավաթյանը։

«Այսօր ամբողջ օրը՝ առավոտյան 9-ից մինչև այս պահը, լիբանանահայությունը արցախյան զորակցության օր հայտարարեց։ Առավոտ կանուխ տեղի հայությունը կատարեց իր ճիտին պարտքը և եկավ իր ստոորագրությունը զետեղելու արցախյան դրոշի վրա։ Դա խորհրդանշական է՝ նկատի ունենալով, որ հայ այս համայնքը վերջին 30 տարիներին միշտ էլ Արցախի հետ է եղել, Արցախի համար արել է շատ բան, Արցախի վերաբնակեցման ընդհանուր գործընթացի մեջ մեծ դեր է ունեցել»,- ասել է Հավաթյանը։

Նրա խոսքով՝ Լիբանանի հայ համայքնի համար միշտ էլ Արցախը եղել է ուշադրության կենտրոնում ու կիզակետում։

«Այսօր բոլորս էլ ապրում ենք հուսահատման պահ Արցախի հողերի կարևոր մասերի կորստից։ Արցախին վիճակված այսօրվա դառը ճակատագիրը սպառնում է արցախցիների ֆիզիկական գոյությանը։ Այս ամենից խռովված են բոլոր հայերը, լիբանանահայ գաղութը իր ասելիքն ունի նաև այս անգամ,- նշել է Հակոբ Հավաթյանը։

Նրա փոխանցմամբ՝ երթին մասնակցել են տարբեր տարիքի հազարավոր քաղաքացիներ, որոնք արաբերեն, անգլերեն, հայերերն պաստառներով շրջել են հայկական համայնքներում ու իրազեկել՝ ինչ է կատարվում Արցախում։