Արցախին մաղթում եմ զգոնություն՝ նոր ղեկավար ընտրելու հարցում․ Երվանդ Թարվերդյան

Արցախին մաղթում եմ զգոնություն՝ նոր ղեկավար ընտրելու հարցում։

Ֆեյսբուքյան էջում գրել է «Միացյալ Հայաստան» կուսակցության հիմնադիր-նախագահ Երվանդ Թարվերդյանը:

«Իրականացավ այն, ինչ դեռ մեկ ամիս առաջ խորհուրդ էի տվել՝ նստացույց անող ԱՀ նախագահին: Նա հրաժարական տվեց, նրան շնորհակալություն եմ հայտնում, որ իշխանատենչությունը ավելի վեր չգնահատեց, քան հայրենիքը, նա իսկապես չէր կարողանում սպասարկել Արցախի առջև դրված մարտահրավերները:

Այս կարևորագույն փուլում Արցախի Հանրապետության բոլոր քաղաքական և հասարակական գործիչներին հորդորում եմ՝ առաջիկայում նախագահի պաշտոնում թեկնածու առաջադրելիս առաջնորդվել բացառապես հետևյալ սկզբունքով`
. նա պետք է լինի անձնավորություն, որը կլինի ի զորու՛ հաղթահարել Արցախի ժողովրդի ներքին հակասությունները,
. նա պետք է լինի անկուսակցական և չհարի ոչ մի քաղաքական ուժի թե' Հայաստանում, թե' Արցախում, որպեսզի իր շուրջը կարողանա համախմբի բոլոր քաղաքական և հասարակական ուժերին,
. նա պետք է լինի 40֊55 տարեկան, որպեսզի ունենա բավարար փորձ, սակայն լինի բավարար երիտասարդ` առկա մարտահրավերներին ֆիզիկապես դիմակայելու համար,
. նա պետք է լինի արցախահայերի և հայ ազգի նպատակների նվիրյալ,
. նա պետք է լինի բնիկ արցախցի
. նա պետք է վայելի բոլորի հարգանքն և սերը,
. օրվա հրամայականից ելնելով, ցանկալի է, որ նա ունենա աշխատանքային փորձ իրավապահ համակարգում։

Նման անձնավորությանը հավանություն տալու դեպքում՝ 24-ժամյա ռեժիմով պատրաստ եմ համագործակցության, անհրաժեշտության դեպքում պատրաստ եմ օրինական և անգամ անօրինական ճանապարհներով հատել սահմանը` նրա կողքին ֆիզիկապես հայտնվելու համար։

Արցախահայությանը մաղթում եմ զգոնություն, սառնասրտություն և հայ ազգի համար բացառիկ ընտրություն»,- գրել է քաղաքական գործիչը։