Հյուսիսային Կորեայի հաքերները կոտրել են ռուսական բալիստիկ և թեւավոր հրթիռներ արտադրող կորպորացիայի համակարգչային ցանցը

Հյուսիսային Կորեայից հաքերները կոտրել են ռուսական НПО Машиностроения կորպորացիայի համակարգչային ցանցը, որն արտադրում է բալիստիկ և թեւավոր հրթիռներ, այդ թվում՝ հիպերձայնային և տիեզերական արբանյակներ։ Այս մասին հայտնում է Reuters-ը։

Խոսքը վերաբերում է հաքերային հարձակման անհայտ աղբյուրից ձեռք բերված ապացույցներին, որոնց փաստը հաստատել են անվտանգության փորձագետները։

Ըստ Reuters-ի՝ 2021 թվականին «հաքերների էլիտար թիմերը», որոնք կապված են ԿԺԴՀ իշխանությունների հետ, մասնավորապես՝ ScarCruft-ը և Lazarus-ը, գաղտնի կերպով լրտեսող ծրագրեր են մտցրել НПО Машиностроения-ի համակարգեր, որի կենտրոնակայանը գտնվում է մերձմոսկովյան Ռեուտով քաղաքում։

Ամիսներ անց Փհենյանը հայտարարեց բալիստիկ հրթիռների մշակման իր ծրագրի մի շարք առաջընթացների մասին: Միևնույն ժամանակ, պարզ չէ, թե արդյոք դա կապված է հաքերային հարձակման արդյունքում ձեռք բերված որևէ տեղեկատվության օգտագործման հետ։

Հաքերները մուտք են գործել НПО Машиностроения-ի ցանցեր 2021 թվականի վերջից մինչև 2022 թվականի մայիսը, երբ ենթադրաբար հայտնաբերվեց հաքերային հարձակումը: Ռուսական ընկերությունը և ՄԱԿ-ի Ռուսաստանի և Հյուսիսային Կորեայի առաքելությունները չեն արձագանքել Reuters-ի մեկնաբանություններին։