Ըստ Apple-ի արտոնագրի՝ նոր սերնդի iPhone-ները կարող են ճկվող էկրանով լինել

Ամերիկյան Apple տեխնոլոգիական ընկերությունը, ի տարբերություն մրցակից Samsung-ի, դեռևս չի ներկայացրել ճկվող էկրանով սմարթֆոն, սակայն ընկերության գրանցած նոր արտոնագիրը թույլ է տալիս ենթադրել, որ Apple-ը մտադիր է նման սարք ներկայացնել:

Ինչպես գրում է Daily Mail-ը, նոր արտոնագրում նկարագրվում է սարք՝ ճկվող բարակ էկրանով, որն անհրաժեշտության դեպքում գլանակի պես փաթաթվում է առանցքի շուրջ:

Ենթադրյալ ճկվող iPhone-ը կունենա էկրանի վրա ապակու պաշտպանիչ շերտ:

Apple-ը պատրաստվում է սեպտեմբերին թողարկել iPhone 15-ը, այնպես որ, եթե ընկերությունը որոշի թողարկել ճկվող սարք, ապա դա կլինի 2024 թվականից ոչ շուտ:

Պարբերականը նաև նկատում է, որ, այնուամենայնիվ, Apple-ին շնորհվել են բազմաթիվ արտոնագրեր, որոնք երբեք չեն վերածվել իրական տեխնոլոգիայի: