Սպիտակ տունը հայտարարել է, որ Բայդենը կողմ է Թուրքիային F-16 կործանիչներ տրամադրելուն

ԱՄՆ նախագահ Ջո Բայդենն աջակցում է Թուրքիային F-16 կործանիչներ տրամադրելու գաղափարին, ասել է ԱՄՆ նախագահի ազգային անվտանգության գծով օգնական Ջեյք Սալիվանը։

Նրա խոսքով՝ նախագահ Բայդենը մի քանի ամսվա ընթացքում հստակ հայտարարել է, որ կողմ է Թուրքիա F-16 մատակարարելուն, եւ այդ քայլը համապատասխանում է ԱՄՆ ազգային շահերին։

Սալիվանն ավելացրել է, որ Թուրքիայի պոտենցիալի ավելացումը համապատասխանում է ՆԱՏՕ շահերին։

ԱՄՆ պետդեպարտամենտի ներկայացուցիչ Մեթյու Միլլերն իր հերթին հայտարարել է, որ ԱՄՆ-ն կողմ է Թուրքիային F-16-եր տրամադրելուն եւ հավանություն է տալիս ԵՄ-ին միանալու Անկարայի ցանկությանը։ Նա ընդգծել է, որ Հյուսիսատլանտյան դաշինքին Շվեդիայի անդամակցությունը եւ Թուրքիային F-16 կործանիչների վաճառքը երկու առանձին հարցեր են, տեղեկացրել է Anadolu Ajansi-ն։