Մենք մտավախություն ունենք, որ Ուկրաինային փոխանցված ցանկացած համակարգ կօգտագործվի մեր դեմ․ Նեթանյահու

Կարծում եմ, որ Իսրայելը գտնվում է հատուկ իրավիճակում, որը տարբերվում է, ասենք, Լեհաստանի, Գերմանիայի, Ֆրանսիայի կամ Ուկրաինային օգնություն տրամադրող ցանկացած արեւմտյան երկրի իրավիճակից։ Այս մասին The Jerusalem Post-ին տված հարցազրույցում ասել է Իսրայելի վարչապետ Բենիամին Նեթանյահուն։

«Նախ՝ մենք մոտ ռազմական սահման ունենք Ռուսաստանի հետ։ Մեր օդաչուները ռուս օդաչուների կողքին թռչում են Սիրիայի երկնքում։ Եվ ես կարծում եմ, որ մենք պետք է կարողանանք հետագայում էլ ազատ գործել մեր հյուսիսային սահմանին՝ ռազմական ուժեր տեղակայելու Իրանի փորձերի դեմ»,- ասել է նա։

Նեթանյահուի խոսքով՝ մտավախություն կա, որ Իսրայելի կողմից Ուկրաինային փոխանցվող ցանկացած համակարգ կօգտագործվի Իսրայելի դեմ, «որովհետեւ դրանք կարող են հայտնվել Իրանի ձեռում եւ օգտագործվել մեր դեմ»։
«Մենք, իհարկե, ցավում ենք Ուկրաինայում տեղի ունեցող ողբերգության, մարդկային այս սարսափելի կորստի համար։ Մենք կցանկանայինք, որ սա ավարտվեր։ Եվ ես կարծում եմ, որ մենք նույնպես հատուկ իրավիճակում ենք, երբ ապագայում կարող ենք լինել այնպիսի դրությունում, որը կօգնի վերջ դնել այս հակամարտությունը: Ես վստահ չեմ, որ դա տեղի կունենա: Դա կարող է լինել միայն հիպոթետիկ, բայց դա կարող է տեղի ունենալ», - ասել է Նեթանյահուն:

Ըստ Նեթանյահուի, Իսրայելի «հավասարակշռված» մոտեցումը ճիշտ է.

«Միջազգային հարցերում պետք է շատ շրջահայաց լինել։ Կա կարեկցանք, կա օգնություն քաղաքացիական պաշտպանության համար. Բայց ես կարծում եմ, որ մենք պետք է զգույշ լինենք, եւ մարդիկ դա պետք է հասկանան։ Պետք է ասեմ, որ արեւմտյան երկրների կառավարությունների ղեկավարների մեծ մասը, երբ ես դա բացատրում եմ նրանց, հիմնականում համաձայն են լինում»,- ​​եզրափակել է նա։