Բայդենի վարչակազմը պետք է գործի դնի 907-րդ բանաձևը. պետք է Կոնգրեսի պատվիրակություն ուղարկել ԼՂ. Սեմ Բրոունբեք

Լեռնային Ղարաբաղի քրիստոնյա բնակչությանը սպառնում է տարածաշրջանից դուրս մղումը: Այս մասին ԱՄՆ Կոնգրեսի Թոմ Լանթոսի անվան մարդու իրավունքների հանձնաժողովում հունիսի 21-ին տեղի ունեցած Լեռնային Ղարաբաղի բնակչության պաշտպանության հարցով լսումների ժամանակ հայտարարել է Հանրապետական կոնգրեսական Սեմ Բրոունբեքը:

«120 քրիստոնյաներ արգելափակված են Ադրբեջանի կողմից, եւ դա դեմ է խաղաղության համաձայնագրին, դեմ է արդարադատության միջզգային դատարանի որոշմանը: Թեեւ ընդունված է ասել, որ այս հակամարտությունը կրոնական չէ, բայց կրոնն այնտեղ ներկա է: Դժվար կլիներ հավատալ, որ այս ամենը տեղի կունենար Լեռնային Ղարաբաղում, եթե այն ունենար մուսուլմանական բնակչություն: Լեռնային Ղարաբաղի քրիստոնյա բնակչությանը սպառնում է տարածաշրջանից դուրս մղումը, եթե մենք կձեռնարկենք որոշակի քաղաքականություն:

Ադրբեջանը պատրաստվում է սեղմել տարածքը՝ պարզապես ստիպելով բնակչությանը հեռանալ և չվերադառնալ: Ադրբեջանն ասում է՝ դուք կարող եք հեռանալ, բայց չեք կարող վերադառնալ: Նրանք կարող են գնալ Եվրոպա, Ամերիկա, Կանադա, այլ վայրեր եւ ստեղծել սփյուռքի այլ օջախներ:

Մենք արդյոք պատրաստվո՞ւմ ենք թույլ տալ, որ ևս մեկ քրիստոնյա բնակչություն դուրս մղվի իր հայրենիքից: Այս ամենն իրականացվում է ամերիկյան կամ իսրայելական զինամթերքով, որ ունեն ադրբեջանցիները: Կարծում եմ, որ եթե Ադրբեջանը չվերացնի շրջափակումը, նախագահ Բայդենի վարչակազմը պետք է գործի դնի 907-րդ բանաձևը»,- ասել է նա:

Կոնգրեսականն առաջարկել է Կոնգրեսի պատվիրակություն ուղարկել Արցախ՝ տեղում իրավիճակը գնահատելու համար: Բրոունբեքը առաջ է քաշել Լեռնային Ղարաբաղի հայերի կրոնական ազատության հարցը և նշել, որ ամերիկյան կրոնական հասարակությունը պետք է աջակցի Լեռնային Ղարաբաղի բնակչության կրոնական ազատության ապահովմանը: