Առաջին անգամ միջնորդի դերի հավակնող կողմը սպառնում է կարգավորման մասնակցին․ Զախարովա

Ռուսաստանի ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ հայտնել է, որ Մոսկվան մտահոգված է լրատվամիջոցներում հայտնված տեղեկատվությամբ, թե ԱՄՆ-ն պարտադրում է Լեռնային Ղարաբաղին հանդիպել Ադրբեջանի հետ, հրաժարվելու դեպքում սպառնում է հակաահաբեկչական գործողությամբ:

Նրա խոսքով ՝ այդ տեղեկությունը ցնցող է, և ԱՄՆ-ն ուղղակի պարտավոր է մեկնաբանել այդ տեղեկությունները:

Զախարովան նշել է, որ Ռուսաստանը մշտապես զբաղվում է հայ-ադրբեջանական կարգավորմամբ, չնայած նրան, որ մոդերացնել ցանկացողները շատ են:

«Մոսկվան պարբերաբար աշխատում է տարբեր ուղղություններով. անցկացվում են բարձր մակարդակի հանդիպումներ, աշխատում են ԱԳՆ-ն եւ հարցով հատուկ ներկայացուցիչը, դեսպանատները, փորձագետները, իսկ անմիջապես տարածաշրջանում ՝ սահմանապահները», — ասել է դիվանագետը:

Զախարովան նշել է, որ այժմ գործընթացին մասնակցել ցանկացողները շատ են, սակայն «ուժային հնարքները» ոչ մի դրական բան չեն բերում, այլ միայն հետ են շպրտում:

«Նման ցանկությունը թելադրված է նրանով, որ այն քայլերը, որոնք ձեռնարկեց Ռուսաստանը՝ որպես Հայաստանի և Ադրբեջանի բարեկամ, շոկ ու զարմանք առաջացրին՝ կարգավորման իրական շանսեր տալով։ Սակայն խնդիրն այն է, որ փորձում են միջամտել նրանք, ովքեր տարածաշրջանին խաղաղություն ու կայունություն չեն ցանկանում։ Իսկ Մոսկվան կշարունակի գործել, առաջին հերթին, դիվանագիտական միջոցներով», — եզրափակել է նա։