Թայվանը հայտարարել է, որ չինական տասը ռազմական ինքնաթիռներ հատել են Թայվանի նեղուցը

Կիրակի Թայվանի ռազմաօդային ուժերը օդ են բարձրացվել այն բանից հետո, երբ չինական տասը ռազմական ինքնաթիռներ հատել են Թայվանի նեղուցը, իսկ պաշտպանության նախարարությունը տեղեկացրել է, որ չինական չորս ռազմանավեր նույնպես մարտական պարեկում են իրականացրել, փոխանցել է Reuters-ը։

Մեկ շաբաթում երկրորդ անգամ է, որ Թայվանը տեղեկացնում է չինական ակտիվության մասին. հինգշաբթի 37 չինական ռազմական ինքնաթիռներ մտել էին կղզու հակաօդային պաշտպանության գոտի, իսկ դրանց մի մասն այնուհետեւ թռել էր դեպի Խաղաղ օվկիանոսի արեւմտյան մաս։

Չինաստանը, որը Թայվանը համարում է իր սեփական տարածքը, վերջին երեք տարում մշտապես իր ռազմաօդային ուժերը բարձրացրել է երկինք կղզուն մոտ տարածքում, բայց ոչ Թայվանի օդային տարածքում։

Թայվանի պաշտպանության նախարարությունը տեղեկացրել է, որ կիրակի օրը, տեղի ժամանակով ժամը 14.00-ի դրությամբ հայտնաբերել է Չինաստանւի 24 ռազմական ինքնաթիռ, ներառյալ J-10, J-11, J-16 եւ Սու-30 կործանիչներ, ինչպես նաեւ H-6 ռմբակոծիչներ։

Գերատեսչությունը չի նշել, թե հատկապես ուր են թռել ինքնաթիռները, բայց տեղեկացրել է, որ դրանցից 10-ը հատել է Թայվանի նեղուցի միջին գիծը, որը միմյանցից բաժանում է երկու կողմերը։

Չինաստանի ՌԾՈւ չորս նավեր նույնպես մասնակցել են «համատեղ մարտական պարեկմանը», ավելացրել են նախարարությունում։

Թայվանը օդ է բարձրացրել սեփական կործանիչները եւ գործի դրել իր նավերն ու ցամաքային հրթիռային համակարգերը, նշել են նախարարությունում։

Չինաստանի պաշտպանության նախարարությունն անմիջապես չի պատասխանել մեկնաբանության մասին խնդրանքին։ Նախարարությունը նաեւ չի մեկնաբանել հինգշաբթի օրվա թռիչքները։

Չինաստանն ավելի վաղ հայտարարել էր, որ նման առաքելություններ իրականացվում են երկրի ինքիշխանությունը պաշտպանելու համար եւ ուղղված են Թայվանի եւ ԱՄՆ-ի՝ կղզու ամենակարեւոր կողմնակցի եւ զենք վաճառողի միջեւ դավադրության դեմ։

Ապրիլին Չինաստանը զորավարժություններ է անցկացրել Թայվանի շուրջ այն բանից հետո, երբ ԱՄՆ է այցելել Թայվանի նախագահ Ցայ Ին-վենը։

Թայվանի կառավարությունը հերքել է Չինաստանի հավակնություններ ինքնիշխանության հարցում եւ հավաստիացնում է, որ միայն կղզու ժողովուրդը կարող է լուծել իր ապագայի հարցը։