Ջասթին Թրյուդոն չհայտարարված այցով ժամանել է Կիեւ

Կանադայի վարչապետ Ջասթին Թրյուդոն շաբաթ օրը չհայտարարված այցով ժամանել է Կիեւ: Այս մասին հայտնում է ՏԱՍՍ-ը՝ վկայակոչելով CBC հեռուստաընկերությունը։

Ըստ տվյալների՝ Թրյուդոն Ուկրաինա է ժամանել իր տեղակալի՝ ֆինանսների նախարար Խրիստյա Ֆրիլանդի ուղեկցությամբ։

Ինչպես նշում է The Globe and Mail թերթը, Կանադայի վարչապետը մեկօրյա ուղեւորության ընթացքում մտադիր է հանդիպել Ուկրաինայի նախագահ Վլադիմիր Զելենսկուն։ Ակնկալվում է, որ բանակցությունները նվիրված կլինեն Օտտավայի կողմից Կիեւին տրամադրվող աջակցությանը, ինչպես նաեւ Ուկրաինայի վերականգնման գործում Կանադայի հնարավոր դերին:

Սա Թրյուդոյի երկրորդ այցն է Ուկրաինա՝ 2022 թվականի փետրվարին ՌԴ հատուկ ռազմական գործողության մեկնարկից հետո։ Նախորդ այցը տեղի է ունեցել 2022 թվականի մայիսին։