Ալեքսեյ Նավալնիին 16-րդ անգամ ուղարկել են տուգանային մեկուսարան

Ռուս հայտնի ընդդիմադիր քաղաքական գործիչ Ալեքսեյ Նավալնին, որը բանտարկված է Վլադիմիրի մարզի Մելեխովո գյուղի խիստ ռեժիմի թիվ 6 գաղութում (ԻԿ-6), կրկին տուգանային մեկուսարան է ուղարկվել։ Այս մասին երկուշաբթի՝ մայիսի 22-ին Twitter-ի իր միկրոբլոգում հայտնել է քաղաքական գործչի ընկեր Իվան Ժդանովը։ «Նավալնին ստացել է հերթական 15 օրը տուգանային մեկուսարանում: Այսօր առավոտյան ժամը 9.30-ին հանձնաժողով էր։ Այլ մանրամասներ դեռ չկան»,- գրել է Ժդանովը։

Նավալնին արդեն 16-րդ անգամ է ուղարկվում ԻԿ-6 մեկուսարան։ Քաղաքական գործիչն այս գաղութում է անցյալ ամառվա կեսերից։ Նախկինում Նավալնիին այստեղ տեղավորելու համար պատճառ էին նշում «արձակված կոճակը» կամ «ոչ ժամանակին լվացվելը»:

Վերջին անգամ Նավալնին մեկուսարանում հայտնվելու մասին հայտարարել էր մայիսի 11-ին։