Վախճանվել է ՌԴ ԳԲԿ նախարարի տեղակալ Պյոտր Կուչերենկոն

Շաբաթ՝ մայիսի 20-ին, 46 տարեկանում վախճանվել է ՌԴ գիտության և բարձրագույն կրթության նախարարի տեղակալ Պյոտր Կուչերենկոն։ Այս մասին հայտնել է գերատեսչությունը՝ ավելացնելով, որ պաշտոնյան մահացել է՝ ռուսաստանյան պատվիրակության Կուբա կատարած գործուղումից վերադառնալիս, տեղեկացնում է «Կոմսոմոլսկայա պրավդան»։

Գերատեսչության հայտարարության մեջ ճշտվում է, որ Կուչերենկոյի ինքնազգացողությունը վատացել է օդանավում, ինչի պատճառով այն վայրէջք է կատարել Մինվոդիում, սակայն բժիշկներն այդպես էլ չեն կարողացել օգնել պաշտոնյային։

2001-2006 թթ․-ին Պյոտր Կուչերենկոն գլխավորել է մի շարք կառույցներ՝ զբաղվելով սոցիալական և կրթական ոլորտներում հասարակական-պետական գործընկերության նախագծերի իրականացմամբ։ 2012 թվականից նա ղեկավարել է օրենսդրության, իրավունքի, դատարանի և քաղաքացիական հասարակության հարցերով զբաղվող հանձնաժողովը։

Գիտության և բարձրագույն կրթության նախարարի տեղակալի պաշտոնը Կուչերենկոն զբաղեցրել է 2020 թվականից։ Բացի դրանից Պյոտր Կուչերենկոն պարգևատրվել է «Հայրենիքի հանդեպ ծառայությունների II աստիճանի» մեդալով և Ռուսաստանի Դաշնության 2-րդ կարգի իսկական պետական խորհրդական էր։