Արևմուտքը ճնշում է գործադրում ԵԱՏՄ-ում և ԱՊՀ-ում Ռուսաստանի դաշնակիցների վրա՝ նրանց խոստանալով «ոսկե սարեր». Լավրով

Արևմուտքը մեթոդաբար և ցինիկաբար ճնշում է գործադրում ԵԱՏՄ-ում և ԱՊՀ-ում Ռուսաստանի դաշնակիցների վրա՝ խոստանալով նրանց «ոսկե սարեր», հայտարարել է ՌԴ ԱԳ նախարար Սերգեյ Լավրովը, փոխանցում է «ՌԻԱ նովոստին»։

«Բազմաթիվ փաստեր կան՝ հիմնված մեր ամենամոտ դաշնակիցների, ռազմավարական գործընկերների գործողությունների, հայտարարությունների վրա, որոնք ասում են, որ իրենց (մեղմ ասած) շատ անհարմար դրության մեջ են դնում», - ասել է Լավրովը «Ցարգրադ» հեռուստաալիքին տված հարցազրույցում։

Միևնույն ժամանակ, դաշնակիցներն իրենք են փորձում չանել որևէ բան, որը տնտեսական վնաս կբերի:

«Նրանք հայտնվել են երկու կրակի արանքում։ Տնտեսական կապերի առյուծի բաժինն ընկնում է Ռուսաստանի Դաշնության, ԵԱՏՄ-ի, ԱՊՀ-ի վրա։ Բայց Արևմուտքի մասնաբաժինը Կենտրոնական Ասիայի և Անդրկովկասի տնտեսության մեջ աճում է։ Արևմուտքը մեթոդաբար և ցինիկաբար պահանջում է իր շահերին հակասող քայլեր չձեռնարկել՝ խոստանալով «ոսկե սարեր»։ Չնայած իրականում դա միայն վերածվում է ներքին գործերին միջամտության»,- ասաց նախարարը։

Միևնույն ժամանակ, Արևմուտքն ընդլայնում է ՀԿ-ների իր ցանցն այս երկրներում, որոնք ֆինանսավորվում են բյուջեից, առաջին հերթին ԱՄՆ-ից, Բրիտանիայից և ԵՄ-ից: Նման կազմակերպությունները հետխորհրդային տարածքի մի շարք երկրներում «իրենց ավելի ու ավելի հանգիստ են զգում և նույնիսկ փորձում» երաժշտություն պատվիրել։

«Բայց այս ամենի հետ մեկտեղ ես համոզված եմ, որ այդ երկրները համերաշխ են Ռուսաստանի Դաշնության հետ։ Նրանք իսկապես մեր դաշնակիցներն են»,- հավելել է նա: