Նիկոլ Փաշինյանը չունի արժեհամակարգ. Նա ունի առաջադրանք եւ լուծում է երեք խնդիր. քաղտեխնոլոգ

2020 թվականի պատերազմի արդյունքում Հայաստանը կապիտուլյացիայի ենթարկվեց եւ այսօր արդեն որոշ շրջաններ Ադրբեջանին են հանձնված, եւ որպեսզի Նիկոլ Փաշինյանն արդարացնի իր կատարածը, բազմաթիվ մեկնաբանություններ է հորինում: Այս մասին NEWS.am-ի հետ զրույցում նշեց քաղտեխնոլոգ Արմեն Բադալյանը՝ անդրադառնալով վարչապետ Նիկոլ Փաշինյանի հայտարարություններին, թե հայկական հայրենասիրության մոդելը սխալ է:

«Այսօր դրանք կարող են վերաբերել հայրենասիրությանը, վաղը կարող են վերաբերել, ասենք, երգուպարին, մյուս օրը՝ երկրագնդի՝ Արեւի շուրջ պտտվելու հանգամանքներին: Նա ցանկացած թեմա կարող է բերել՝ արդարացնելու համար տեղի ունեցաը, ասելու, որ 2020-ին պարտվեցինք, որովհետեւ մեղավոր էր ժամանակին հայրենասեր չդաստիարակված ազգը, մեղավոր էր 5-րդ շարասյունը, 100 դոլարով թշնամուն տեղեկություններ հայտնող դավաճանները, դասալիքները, մեղավոր էր ընդդիմությունը, մեղավոր էր Ռուսաստանը, բոլորը, բացի իրենից: Եթե այս հայտարարություններն արվեին 2018-ի իշխանափոխությունից հետո, դեռ կարելի էր քննարկել, այս 5 տարվա գործունեությունը ցույց է տվել,որ վարչապետի որեւէ ասած իմաստ չունի քննարկել»,-ասաց նա:

Բադալյանի խոսքով, Նիկոլ Փաշինյանը կարծում է, որ նման բաներ հնչեցնելով կարող է ընտրություններում նորից քվե ստանալ:

«Նա ասում է՝ կան վատ ղարաբաղիցներ եւ լավ հայաստանցիներ: Ղարաբաղը մեզ պետք չի, հանձնենք եւ պաշտպանենք այն, ինչը մեզ դեռ թույլ են տալիս պաշտպանել՝ Հայաստանը: Սա սեւ ու սպիտակի բաժանման մի այլ տարբերակն է, սեւերը ղարաբաղիցներն են, սպիտակները՝ հայաստանցիները: Սեւը Ղարաբաղն է, սպիտակը՝ Հայաստանը»,-ընդգծեց քաղտեխնոլոգը:

Ինչ վերաբերում է արժեհամակարգին, որի մասին խոսում է Փաշինյանը, Արմեն Բադալյանն ասաց. «Ինքն ընդհանրապես արժեհամակարգ չունի: Ինքը արժեհյամակարգի մասին խոսելով լուծում է երեք հարց. Արցախը թողնել Ադրբեջանի կազմում ինքնավարության կամ զրո ինքնավարության կարգավիճակով, Հայաստանից դուրս բերել ռուսական բազան եւ թեքվել դեպի Արեւմուտք, եւ Զանգեզուրի միջանցքը հանձնել Արեւմուտքին: Նա այս խնդիրները պետք է կատարի, քանի որ Արեւմուտքն իրեն դրա համար է բերել: Նրա բոլոր արտահայտություններն ուղղված են այս երեք խնդիրների կատարմանը: Դրածոները արժեհամակարգ չունեն, ունեն առաջադրանք, որը պետք է կատարեն»: