Թաիլանդը մինչեւ սեպտեմբեր հետաձգել է զբոսաշրջային վճարի ներդրումը

Թաիլանդը մինչեւ սեպտեմբեր հետաձգել է զբոսաշրջային վճարի ներդրումը։ Այս մասին հայտարարել է Թաիլանդի զբոսաշրջության եւ սպորտի նախարար Պիպատ Ռատչակիտպրականը։ Նրա խոսքով՝ պատճառն այն է, որ ավիաընկերությունները չեն կարող ընտրովի մոտեցում ցուցաբերել օտարերկրացիների, թաիլանդցիների եւ արտագաղթողների նկատմամբ, հաղորդել է Bangkok Post թերթը:

Միեւնույն ժամանակ, տուրիստական օպերատորները կոչ են անում ավելի հստակ կանոններ սահմանել վճարի հետ կապված, քանի որ ավիաընկերությունները պնդում են նույն վերաբերմունքը բոլոր ուղեւորների նկատմամբ: Փետրվարին նախարարների կաբինետը հավանություն է տվել հունիսի 1-ից օտարերկրյա զբոսաշրջիկների վճարի ներդրմանը, որը կտատանվի 150-300 բաթ (4-9 դոլար):

Պհուկետի տուրօպերատորների ասոցիացիան կարծում է, որ եթե ավիաուղեւորների համար վճարների ներդրումը հետաձգվի մինչեւ սեպտեմբեր, ապա այն պետք է հետաձգվի նաեւ ցամաքային եւ ծովային սահմաններով ժամանող ճանապարհորդների համար: Մինչդեռ ոլորտի մասնագետները ուշադրություն են դարձրել այն հանգամանքին, որ ցամաքային ճանապարհով մուտքի համար 150 բաթի չափով վճարը կարող է ազդել անդրսահմանային այցելուների թվի վրա, ինչպիսիք են մալայզիացի զբոսաշրջիկները, որոնք հանգստյան օրերին ամեն ամիս ժամանում են Սոնգխլա նահանգ: