Հնդկական Հիմալայներում ձնահյուսի հետեւանքով 7 զբոսաշրջիկ է զոհվել

Հնդկական Հիմալայներում Սիկկիմ նահանգում երեքշաբթի օրը ձնահյուսի հետեւանքով 7 զբոսաշրջիկ է զոհվել, փրկարարները դադարեցրել են մարմինների որոնումները, հաղորդում է Reuters-ը:

Բանակը հայտնել է առնվազն 20 մարդու փրկության մասին։

Տեղի ոստիկանությունը հավելել է, որ փրկվածներից ութը գտնվում է ծայրահեղ ծանր վիճակում:

«Մենք փրկարարական գործողությունը չեղարկելուց առաջ եւս մեկ ստուգում ենք անցկացնում, քանի որ արդեն մթնել է եւ սկսել է ձյուն տեղալ»,-գործակալությանը պատմել է ոստիկանության բարձրաստիճան ներկայացուցիչ Տենցինգ Լոդեն Լեպչան:

Վերջին երկու տարվա ընթացքում հնդկական Հիմալայներում մի քանի ձնահյուսներ են տեղի ունեցել, ինչի հետեւանքով զոհվել է առնվազն 120 մարդ: 2018-ին ամերիկյան Proceedings of the National Academy of Sciences ամսագրում կատարված ուսումնասիրության արդյունքում եզրակացություն է արվել, որ կլիմայի փոփոխությունը մեծացրել է ձնահյուսի վտանգը հնդկական Հիմալայներում:

Երեքշաբթի տեղի ունեցած աղետի պատճառները պարզ չեն։ Միջադեպը տեղի է ունեցել տեղական ժամանակով ժամը 11:30-ին: Փրկարարական ծառայությունների ներկայացուցիչներն ավելի վաղ հայտնել էին, որ մտավախություն ունեն, որ առնվազն 70 մարդ ձյան տակ է հայտնվել։

Հիմալայներում ձնահյուսները եւ ջրհեղեղները տարածված են ամռան եւ մուսոնային սեզոնի ժամանակ։

2013-ի հունիսին Հյուսիսային Հիմալայան Ութարախանդ նահանգում ռեկորդային մուսոնային անձրեւները ավերիչ ջրհեղեղների են հանգեցրել՝ խլելով գրեթե 6000 մարդու կյանք եւ դառնալով երկրի ամենասարսափելի բնական աղետներից մեկը: