Ինչո՞ւ եք նվազեցնում Զազուի արժեքը. Կադիրովն ասել է, որ իր գողացված ձին արժե 10 միլիոն դոլար

Չեչնիայի ղեկավար Ռամզան Կադիրովն արձագանքել է Չեխիայում իր Զազու անունով մաքրացեղ ձիու գողությանը։ Չեչնիայի ղեկավարի խոսքով՝ կենդանին դեռ 2014 թվականից է հայտնվել արևմտյան պատժամիջոցների ցանկում։

«Այսօր պարզվում է, որ անհայտ անձինք գողացել են Զազուին»,- գրել է Կադիրովը Telegram-ի իր ալիքում։

Քաղաքական գործիչը զարմացել է, թե ինչպես կարող էր գողությունը տեղի ունենալ, եթե ձին չէր պահվում «ինչ-որ գավառական ֆերմայում», մինչդեռ տեղի ոստիկանությունը կատարվածի մասին իմացել է մինչև մի քանի օր անց։

«Եվ, ի դեպ, խնդրում եմ, որ չնվազեցնեք իմ ձիու արժեքը։ Լրատվամիջոցները, հիմնվելով իշխանությունների ասածին, դրա արժեքը ներկայացրել են 18 հազար դոլար: Հավանաբար, այս արհեստական թերագնահատումը կապված է ֆինանսական խարդախության հետ, որը իրականացրել են կենդանու պահպանման և խնամքի համար պատասխանատուները: Մաքրացեղ Զազուն արժե առնվազն 10 միլիոն դոլար»,- ասել է Կադիրովը:

Նրա խոսքով՝ հիմա, իմանալով ձիու իրական գինը, գողացողը կարող է լավ շահույթ ստանալ։

Աղբյուրը մանրամասնում է, որ արևմտյան պատժամիջոցների սահմանումից հետո, Զազուն ու Չեխիայում գտնվող մի քանի այլ ձիեր ընդգրկվել են Կադիրովի սառեցված ունեցվածքի ցանկում։ Նշվում է, որ Ուկրաինայում պատերազմի մեկնարկից մեկ ամիս առաջ երկու ռուսալեզու տղամարդ փորձել են հովատակին չեխական ախոռից Լեհաստան տեղափոխել, սակայն հաստատության տերը նրանց թույլ չի տվել դա անել։ Կենդանին գնվել է 2012 թվականին, արժանացել բազմաթիվ մրցավազքի մրցանակների:

Այս թեմայով Կադիրովի 16-ամյա որդին նշանակվել է ՌԴ ՊՆ գումարտակի համակարգող Ռամզան Կադիրովը պատմել է Պուտինի հետ իր որդու հանդիպման մասին