Նիգերիայում նախագահական ընտրություններ են ընթանում

Նիգերիայում շաբաթ օրը մեկնարկել են նախագահական ընտրությունները, հաղորդում է The Associated Press-ը:

Նախագահական եւ խորհրդարանական ընտրություններն անցկացվում են երկրի հյուսիսում իսլամական զինյալների եւ հարավում անջատողականների կողմից բռնությունների մտավախությունների ֆոնին, թեեւ իշխանություններն ընդգծում են, որ այս տարի քվեարկությունը չի հետաձգվի, ինչպես դա եղել է վերջին երկու նախագահական ընտրություններում:

Ինչպես նշում են ԶԼՄ-ները, երկրում նկատվում է նաեւ արժութային ճգնաժամ։

Քվեարկության ընթացքին ուշադիր հետեւում են, քանի որ Նիգերիան Աֆրիկայի խոշորագույն տնտեսությունն է եւ մայրցամաքի նավթի գլխավոր արտադրողներից մեկը: Ըստ ՄԱԿ-ի գնահատականների՝ մինչեւ 2050 թվականը Նիգերիան բնակչության թվով կհավասարվի ԱՄՆ-ին եւ կդառնա աշխարհի երրորդ ամենաբնակեցված երկիրը Հնդկաստանից եւ Չինաստանից հետո:

Աֆրիկյան պետության ղեկավարի պաշտոնի համար առաջադրվել է 18 թեկնածու։

Գործող նախագահ Մուհամմադ Բուխարին առողջության հետ կապված խնդիրներ ունի եւ հաճախ է բուժման նպատակով արտասահման մեկնում։ Առաջատար թեկնածուներից երկուսն արդեն 70-ն անց են, եւ երկուսն էլ Նիգերիայում քաղաքականություն են վարում 1999 թվականից:

Ի տարբերություն նրանց՝ Լեյբորիստական կուսակցության երրորդ կուսակցության թեկնածու Փիթեր Օբին, որը 61 տարեկան է, հավակնորդներից ամենաերիտասարդն է։

Մեկ այլ թեկնածու Բոլա Թինուբուն վայելում է իշխող «Բոլոր առաջադիմական կոնգրեսներ» կուսակցության հզոր աջակցությունը՝ որպես գործող նախագահի կարեւոր աջակից, իսկ Աթիքու Աբուբաքարը հայտնի է որպես Նիգերիայի ամենահարուստ գործարարներից մեկը: Նախկինում նա զբաղեցրել է փոխնախագահի պաշտոնը, ինչպես նաեւ 2019 թվականին առաջադրվել է նախագահի պաշտոնում Ժողովրդադեմոկրատական կուսակցության կողմից։