Օքլենդ-Նյու Յորք չվերթի ուղեւորները 16 ժամ օդում են անցկացրել, այնուհետեւ կրկին Օքլենդ են վերադարձել

Նոր Զելանդիայից Նյու Յորք չվերթի ուղեւորները 16 ժամ օդում են անցկացրել, որպեսզի կրկին հայտնվեն նույն օդանավակայանում, որտեղից սկսել են իրենց ճանապարհորդությունը, հայտնում է UPI-ն:

Օքլենդից Նյու Յորք չվերթն իրականացնող Air New Zealand օդանավը հինգշաբթի օդում է եղել մոտ 8 ժամ եւ գտնվել է Կալիֆոռնիայից մոտ 2000 մղոն հեռավորության վրա, երբ ավիաընկերությունը հաղորդում է ստացել, որ Նյու Յորքի Ջոն Քենեդու անվան միջազգային օդանավակայանում էլեկտրասարքերի բռնկումը հանգեցրել է 1-ին տերմինալի փակմանը։

Ավիաընկերությունը հայտնել է, որ որոշում է կայացվել, որպեսզի ինքնաթիռը շրջվի եւ վերադառնա Օքլենդ, որտեղ այն վայրէջք է կատարել թռիչքից մոտ 16 ժամ անց:

«Ամերիկյան մեկ այլ օդանավակայան վերաուղղելը կնշանակեր, որ ինքնաթիռը մի քանի օր կմնար գետնին, ինչը կազդեր մի շարք այլ կանոնավոր չվերթների եւ հաճախորդների վրա»,- New Zealand Herald-ին ասել է ավիաընկերության ներկայացուցիչը:

1-ին տերմինալը փակ է մնացել ուրբաթ օրը, մինչ բրիգադները վերացրել են անսարքությունը։

Ավիաընկերությունը ներողություն է խնդրել ուղեւորներից եւ խոստացել է հաջորդ չվերթով նրանց հասցնել նախատեսված վայր։