Նոր Զելանդիայում «Գաբրիել» ցիկլոնի հետեւանքով զոհերի թիվը հասել է 11-ի, անհետ կորած են հազարավոր մարդիկ

Կիրակի օրը Նոր Զելանդիայում «Գաբրիել» ցիկլոնի զոհերի թիվը հասել է 11-ի, հայտնում է Reuters լրատվական գործակալությունը եւ հավելում, որ հազարավոր մարդիկ անհետ կորած են համարվում։

Փետրվարի 12-ին ցիկլոնը հարվածել է կղզու ամենահյուսիսային շրջանին եւ շրջել է արեւելյան ափում՝ առաջացնելով համատարած ավերածություններ: Վարչապետ Քրիս Հիփքինսը «Գաբրիել»-ն անվանել է այս դարում Նոր Զելանդիայի ամենամեծ բնական աղետը։

Հիփքինսը մայրաքաղաք Վելինգտոնում լրագրողներին ասել է, որ հնարավոր է ավելի շատ զոհեր լինեն, քանի որ 6,431 մարդ դեռեւս անհետ կորած է համարվում, իսկ 3,216-ը՝ ապահով է:

Մատակարարման շղթաները խաթարվել են՝ առաջացնելով ապրանքների տեղաշարժի հետ կապված խնդիրներ, զգալի քանակությամբ բերք է ոչնչացվել եւ 28 հազար տուն դեռեւս հոսանքազրկված է, նշել է նա։

«Ավերածությունների ու կորստի իրական չափերն օրեցօր ավելի պարզ են դառնում», - ասել է վարչապետը։

Առաջիկա օրերին Ֆիջիից թիմ կմեկնի Նոր Զելանդիա՝ աջակցելու վերակառուցմանը, հայտնել է Հիփքինսը՝ հավելելով, որ դա մինչ այժմ ստացված 12 միջազգային օգնության առաջարկներից մեկն է: Ավստրալիայից շտապ օգնության քսանյոթ աշխատակիցներ օգնություն են ցուցաբերում:

Արտակարգ իրավիճակների ծառայությունները եւ զինվորականները ուղղաթիռներից կենսական պաշարներ են առաքում այն ​​համայնքներին, որոնք արգելափակված են այն բանից հետո, երբ ցիկլոնը քշել տարել է ֆերմաները, կամուրջները, անասունները եւ հեղեղված տները: