Նիգերիացի քաղաքական գործիչը եւ նրա կինը կանգնել են դատարանի առջեւ՝ մարդու օրգանները հեռացնելու փորձի մեղադրանքով

Նիգերիայի սենատի նախկին փոխնախագահ Այիկ Էկվերեմադուն եւ նրա կինը երեքշաբթի օրը ներկայացել են Լոնդոնի դատարան՝ օրգաններ հանելու մեղադրանքով դատավարությունից առաջ, սակայն նրանց դուստրը, որին նույնպես մեղադրանք է առաջադրվել, չի կարողացել ներկա գտնվել, քանի որ հիվանդանոցում է, հայտնում է AFP-ն:

Էկվերեմադուն, նրա կինը՝ Բեատրիսը, դուստրը՝ Սոնյան, եւ մի բժիշկ մեղադրվում են երիկամը հեռացնելու համար Նիգերիայից 21-ամյա մի երիտասարդի բերելու մեջ։

Դատախազներն ասել են, որ ամբաստանյալները իբր ծրագրել են հեռացնել տղամարդու երիկամը, որպեսզի այն հետագայում տան Սոնյային։

Հաղորդվում է, որ մեղադրողն ահազանգել է այն բանից հետո, երբ հրաժարվել է համաձայնություն տալ Լոնդոնի հյուսիսային հիվանդանոցներից մեկում նախնական անալիզներից հետո պրոցեդուրային:

Մեղադրանքներն առաջադրվել են այն բանից հետո, երբ տղամարդը դիմել է ոստիկանություն։ Էկվերեմադուները ձերբակալվել են անցյալ հունիսին՝ Լոնդոնի «Հիթրոու» օդանավակայանում:

Մեկ այլ տղամարդ՝ հարավային Լոնդոնից 50-ամյա բժիշկ Օբինա Օբետան, ավելի ուշ է ձերբակալվել:

Էկվերեմադուն ընդդիմադիր «Ժողովուրդների դեմոկրատական կուսակցությունից» սենատոր է Նիգերիայի հարավ-արեւելքում գտնվող Էնուգու նահանգում:

Էկվերեմադուն եւ բժիշկը մեղադրվում են դավադրության մեջ՝ այլ անձի ճանապարհորդությունը շահագործման նպատակով կազմակերպելու համար՝ ստրկության մասին Մեծ Բրիտանիայի օրենքի համաձայն:

Ենթադրվում է, որ հանցագործությունը կատարվել է 2021 թվականի օգոստոսից 2022 թվականի մայիսն ընկած ժամանակահատվածում։

Այիկ Էքվերեմադուին մերժել են գրավի դիմաց ազատ արձակել այն մտավախությունների պատճառով, որ նա կարող է փախչել Մեծ Բրիտանիայից:

Օբետան նույնպես ձերբակալվել է։ Բեատրիսը եւ Սոնյա Էկվերեմադուները պայմանական գրավի դիմաց ազատ են արձակվել։