ABL Space Systems-ի RS1 հրթիռի առաջին ուղեծրային արձակումն ավարտվել է պայթյունով. առաջին փուլում 9 շարժիչները միաժամանակ անջատվել են

ABL Space Systems ընկերության RS1 հրթիռի ուղեծրային առաջին արձակումը ձախողվել է. առաջին փուլում ինը շարժիչները միաժամանակ անջատվել են, ինչի հետևանքով հրթիռն ընկել է արձակման հարթակի վրա և պայթել: Հրթիռում եղել են երկու փոքր OmniTeq արբանյակներ:

Հրթիռի առաջին թռիչքը նախատեսված էր հունվարի 10-ին։ Գործարկումից 20 րոպե անց ընկերությունը սոցցանցերում տեղեկացրել էր, որ արձակումը ձախողվել է:

«Գործարկումից հետո RS1-ը բախվեց անոմալիայի և ժամանակից շուտ անջատվեց: Թիմը PSCA-ի և FAA-ի հետ համատեղ աշխատում է անոմալիաների արձագանքման մեր ընթացակարգերի վրա»,- ասվում էր ABL Space Systems-ի թվիթերյան էջում զետեղված հաղորդագրությունում։

Ավելի ուշ հայտնի դարձան կատարվածի որոշ մանրամասներ. արձակումից անմիջապես հետո առաջին փուլում բոլոր ինը շարժիչները, ինչպես նշվեց վերևում, միաժամանակ անջատվել էին, ինչի հետևանքով հրթիռն ընկել է և պայթել։ Պայթյունի հետևանքով անձնակազմից և առհասարակ ոչ ոք չի տուժել, իսկ հրդեհը շուտով մարվել է։ Ճիշտ է, հրթիռը գործարկող սարքավորումը, ինչպես և սպասվում էր, վնասվել է։

«Սա այն արդյունքը չէ, որը մենք սպասում էինք այսօր, այլ այն, որին մենք պատրաստ էինք»,- ասել են ընկերությունից՝ հավելելով, որ այս միջադեպի հետաքննության ավարտից հետո ընկերությունը կշարունակի թռիչքները։

RS1-ը փոքր երկաստիճան մեկնարկային հրթիռ է, որը կարող է մինչև 1350 կգ օգտակար բեռ տեղափոխել Երկրի ցածր ուղեծիր: Հրթիռն ունի ինը E2 տիպի շարժիչ առաջին փուլի համար և մեկ E2 շարժիչ երկրորդ փուլի համար, որը որպես վառելիք օգտագործում է կերոսին և հեղուկ թթվածին։

Հիշեցնենք, որ վերջերս Մեծ Բրիտանիայից առաջին տիեզերական արձակումը նույնպես ձախողվել էր, ինչի հետևանքով Virgin Orbit-ը կորցրել էր ինը արբանյակ, որոնք ցանկանում էր տիեզերք ուղարկել: