Լաչինի միջանցքի շուրջ ստեղծված իրավիճակը խաթարում է խաղաղ գործընթացի հանդեպ միջազգային վստահությունը․ ԱՄՆ
ԱՄՆ-ը խորապես մտահոգված է Լաչինի միջանցքի օգտագործման հարցում ներկայիս խոչընդոտներով եւ այս իրավիճակի մարդասիրական աճող հետեւանքներով։ Այս մասին ասել է ՄԱԿ-ում ԱՄՆ ներկայացուցիչ Ռոբերտ Վուդը Անվտանգության խորհրդում Լաչինի միջանցքում տիրող իրավիճակի վերաբերյալ Հայաստանի հայտարարության հիման վրա հրավիրված քննարկման ժամանակ։
«Հստակ հայտարարում եմ, որ Լաչինի միջանցքի օգտագործման խոչընդոտները հետ են շպրտում խաղաղ գործընթացը՝ խաթարելով միջազգային վստահությունը այս գործընթացի նկատմամբ։ Այս իրավիճակը կարող է հանգեցնել պոտենցիալ սարսափելի մարդասիրական հետեւանքների: Մենք կոչ ենք անում Ադրբեջանի կառավարությանը եւ միջանցքի անվտանգության համար պատասխանատու մյուս կողմերին հնարավորինս արագ վերականգնել տեղաշարժի ազատությունը, այդ թվում՝ մարդասիրական եւ առեւտրային տրանսպորտի համար։ Մեզ ոգեւորում է Լեռնային Ղարաբաղի բնակչության գազամատակարարման վերականգնումը։ Այս ծառայողներին խոչընդոտելու ցանկացած փորձ սպառնալիք է Լեռնային Ղարաբաղի խաղաղ բնակչության համար։ Սա անընդունելի է։ ԱՄՆ-ն այսուհետ եւս կոչ կանի բոլոր կողմերին ցուցաբերել զսպվածություն ու անհապաղ դադարեցնել խաղաղ գործընթացը խաթարող բոլոր քայլերը եւ հարգել միջազգային մարդասիրական իրավունքով ստանձնած պարտավորությունները:
Հայաստանի եւ Ադրբեջանի չլուծված խնդիրները պետք է կարգավորվեն խաղաղ բանակցությունների միջոցով. Բանակցությունները կայուն խաղաղության հասնելու միակ ճանապարհն են։ Միջազգային հանրությունը պետք է անի հնարավոր ամեն ինչ եւ աջակցի դիվանագիտական ճանապարհով խաղաղության հասնելու ջանքերին։
Ժամանակը ցույց է տվել, որ այս հակամարտությունը չի կարող ունենալ միակողմանի, ռազմական լուծում։ Երկու կողմերն էլ պետք է հայտարարեն դիվանագիտական գործընթացին իրենց հավատարմության մասին եւ վերականգնեն հաղորդակցության ուղիղ խողովակները։ Բոլոր կողմերը պետք է ակտիվացնեն դիվանագիտական շփումները եւ առաջընթացի հասնեն հարաբերությունների կարգավորման ուղղությամբ համապարփակ խաղաղ համաձայնագրի միջոցով։ Պետք է հասնել բոլոր առկա խնդիրների համապարփակ կարգավորմանը։ ԱՄՆ-ը հավատարիմ է կայուն զինադադարին եւ այս հակամարտության խաղաղ լուծմանը: Մենք դեռ ակտիվորեն մասնակցում ենք այս նպատակին հասնելու երկկողմ, բազմակողմ ձեւաչափերին: Պատրաստ ենք այսուհետ եւս նպաստել Երեւանի եւ Բաքվի միջեւ երկխոսությանը»,- նշել է նա։
Տարոն Մարգարյանը կգործուղվի Մոսկվա
Հավանաբար ԱԱԾ աշխատողները գտել իշխանությանը լոյալ քահանաների, իրենց են դիմել, ինձ չեն դիմել. Տեր Նշա...
44-օրյա պատերազմը սկսվել է երկու պատճառով․ Հայաստանի խորհրդարանի փոխնախագահ
Պոլսո Հայոց Պատրիարքը չի հստակեցնում՝ դե՞մ է Կաթողիկոսի հեռացման պահանջին, թե ոչ
Բագրատ Սրբազանի խափանման միջոցը փոխելու միջնորդություն է ներկայացվել
«Ձեր ուսանողը չեմ, որ ինձ հարցեր տաք», «Պարտավոր եք դրսևորել պատշաճ վարքագիծ, ավել բան մի՛ ասեք»
Սի Ծինփինը ներկայացրել է Չինաստանի դիրքորոշումը Ուկրաինայի հակամարտության խաղաղ կարգավորման վերաբերյ...
Զախարովան Կալլասին և Կոսին համեմատել է վամպիրների հետ՝ Երևանի հետ հարաբերությունների մասին հայտարարո...
Կիևի պահանջները նման են անհատակ փոսի․ Սիյարտո
Այո’, թող Արթիկի ՔԿՀ պետի տեղակալը և ընտանիքը հետևություն անեն. Գալյանը՝ Զորական գյուղում պատանու ծե...