Անչելոտին՝ ընթացիկ առաջնությունում «Ռեալի» առաջին պարտության մասին

Իսպանիայի չեմպիոն եւ Չեմպիոնների լիգայի գավաթակիր Մադրիդի «Ռեալի» իտալացի գլխավոր մարզիչ Կառլո Անչելոտին մեկնաբանել է «Ռայո Վալիեկանոյից» կրած 2:3 հաշվով պարտությունը Իսպանիայի առաջնության 13-րդ տուրի խաղում։

Արքայական թիմն առաջին պարտությունը կրեց Լա Լիգայի ընթացիկ մրցաշրջանում եւ նահանջեց երկրորդ տեղ՝ 2 միավոր հետ մնալով առաջատար «Բարսելոնայից»։

«Թարմության պակաս ունենք, ինչը նորմալ է այսքան շատ հանդիպումներից հետո։ Պետք է գնահատել մրցաշրջանի առաջին կեսը, վերհանել սխալները, վերլուծել եւ շարժվել առաջ։ Անհանգստացնում է այս պարտությունը, բայց մենք լավ դիրքում ենք Իսպանիայի առաջնությունում եւ դուրս ենք եկել Չեմպիոնների լիգայի փլեյ-օֆֆ։ Հիմա պետք է լավ ավարտել «Կադիսի» դեմ վերջին հանդիպումը դադարից առաջ»,- Անչելոտիի խոսքը մեջբերում է AS-ը։

Իսպանիայի առաջնության հաջորդ տուրի «Ռեալ» - «Կադիս» հանդիպումը տեղի կունենա նոյեմբերի 10-ին։ Նոյեմբերի 20-ից դեկտեմբերի 18-ը Քաթարում անցկացվելիք աշխարհի առաջնությունից հետո Իսպանիայի առաջնությունը կվերսկսվի դեկտեմբերի 31-ին։