Լեհաստանը Հարավային Կորեայից K239 Chunmoo ՀԿՌՀ-եր կգնի

Լեհաստանը հարյուրավոր հարավկորեական համազարկային կրակի ռեակտիվ համակարգեր (ՀԿՌՀ) գնելու համաձայնագիր է ստորագրել՝ Ուկրաինայի պատերազմի լույսի ներքո ազգային պաշտպանությունն ամրապնդելու ջանքերի ֆոնին, հայտնում է Reuters-ը:

Փոխվարչապետ Մարիուշ Բլաշչակը, որը նաեւ Լեհաստանի պաշտպանության նախարարն է, ասել է, որ K239 Chunmoo համակարգերը համեմատելի են ԱՄՆ-ի արտադրության HIMARS կայանների հետ, որոնցից որոշ քանակություն եւս Լեհաստանը ձեռք է բերում:

Բլաշչակն ասել է, որ Լեհաստանը չի կարող կարճ ժամանակում ստանալ այնքան շատ HIMARS, որքան կցանկանար, ուստի նա դիմել է Հարավային Կորեայում «վստահելի գործընկերոջը, մեր բարեկամներին»՝ 288 հատ Chunmoo արձակման կայաններ գնելու համար:

Հարավային Կորեայի պաշտպանության նախարար, գեներալ-լեյտենանտ Լի Չոն Սոպը հայտարարել է, որ գործարքը երկու երկրների միջեւ համագործակցությունը նոր մակարդակի է բարձրացնում:

Հուլիսին եւ սեպտեմբերին Լեհաստանը Հարավային Կորեայից միլիարդավոր դոլարների տանկերի, հաուբիցների եւ կործանիչների մատակարարման պայմանագիր է ստորագրել։ Բլաշչակի խոսքով՝ տանկերի ու հաուբիցների մատակարարումն արդեն սկսվել է։

Սպասվում է, որ շարժական կայանները կառաքվեն հաջորդ տարի եւ կտեղակայվեն լեհական արտադրության Jelcz բեռնատարների վրա։