Պետք է ճաքեր մտցնել այն սյուների մեջ, որոնք պահում են Փաշինյանի ու իր իշխանության տանիքը. Մենուա Սողոմոնյան

Երբ ԱԺ բակում տեղի էր ունենում ինքնաբուխ հավաքը, այդ ժամանակ հիմնվելով այն հանգամանքի վրա, որ այս օրերի ընթացքում ինձ իմ գործընկերներին մեր շատ քաղաքացիներ խնդրում էին, առաջարկում էին քաղաքական լուծումների վերաբերյալ առաջարկություններով հանդես գալ, մենք ասացինք, որ լուծումներից մեկը կարող է լինել այն, որ ժողովուրդը ցանցային ձեւով, կոլեկտիվների կազմակերպմամբ, ուսանողական խմբերի կազմակերպմամբ դուրս գան փողոց եւ հատկապես առավոտվա ժամերին արգելափակելով պետական կառույցների մուտքերը, ձգտեն պարալիզացնել այդ կառույցների աշխատանքը՝ դրանով սասանելով այս իշխանության հիմքերը: Այս մասին, այսօր՝ սեպտեմբերի 16-ին, Կառավարության դիմաց լրագրողների հետ զրույցում նշեց «Համախմբում» նախաձեռնության անդամ, ԵՊՀ դասախոս Մենուա Սողոմոնյանը:

«Ընդդիմության ղեկին գտնվող Նիկոլ Փաշինյանի եւ նրա մերձավոր մարդկանց հեռացնելու համար անհրաժեշտ է որոշակի ճաքեր մտցնել այն սյուների մեջ, որոնք պահում են Փաշինյանի ու իր իշխանության տանիքը»,- ասաց նա:

Սողոմոնյանը նաեւ հիշեցրեց, որ երեք իրենք առաջարկել էին, որ այսօր առավոտյան 08։30-ին մարդիկ լինեն Հանրապետության հրապարակում, որովհետև այս հատվածում տեղակայված են շատ կառույցներ. «Կախված մարդկանց քանակից՝ մենք պիտի որոշեինք, թե որ պետական կառույցի դեմ էինք անում խաղաղ անհնազանդության ակցիա։ Այս պահի դրությամբ քիչ մարդիկ են հավաքվել։ Բայց ես, բնականաբար, հակված չեմ այն տարբերակին, որ այսօրվա դեպքի հիման վրա պետք է ասել, թե մեր նշած գաղափարը կենսունակ չէ։ Գաղափարը իրականում կենսունակ է։

Ակցիաները միայն Երևան քաղաքին չի վերաբերվում, խոսքը նաև մարզերի մասին է։ Ժողովուրդ, պետք չի սպասել, որ ինչ-որ մի հատ մեծ ուժ պիտի այս ամենը նախաձեռնի, սա պիտի յուրաքանյուրը անի՝ կազմակերպված ձևով։ Դուք պիտի դուրս գաք փողոց ու տարբեր խաղաղ անհնազանդության ակցիաներ անեք մեր նշած ձևով»,- ընդգծեց նա։

Նշենք, որ երեկ՝ Ազգային ժողովի շենքի դիմաց տեղի ունեցած հերթական հանրահավաքի ժամանակ 5165 շարժման հիմնադիր Կարին Տոնոյանը ներկայացնելով իրենց օրակարգը հայտարարել էր, որ այսօրվանից գործադուլ ու դասադուլ են հայտարարում, պետք է շրջափակվեն կառավարման շենքեր. «Վաղը 8.30-ին մենք ձեզ սպասում ենք Հանրապետության հրապարակում՝ սկսելու մեր խաղաղ անհնազանդության ակցիաները, շրջափակում ենք կառավարությունը, նախարարությունները, Ազգային ժողովը, դատախազությունը, բոլոր այն կառույցները, որոնք պահում են այս իշխանիկին»,-հայտարարել էր նա: