ԵՄ-ը դադարեցնում է օգնությունը Ուկրաինային գազային ճգնաժամի մտավախության պատճառով. Bloomberg

Եվրամիությունը հայտնվել է փակուղում Ուկրաինային օգնության զգալի փաթեթ հատկացնելու բարձրագոչ խոստումների պատճառով, քանի որ բախվել է լուրջ տնտեսական խնդիրների հեռանկարին, գրել է Bloomberg-ը։

Մոտ երկու ամիս առաջ Եվրոպական հանձնաժողովի նախագահ Ուրսուլա ֆոն դեր Լյայենը առաջարկել էր Ուկրաինային տրամադրել 9 մլրդ եվրո՝ որպես արտակարգ վարկ։ ԵՄ-ին առայժմ հաջողվել է պայմանավորվել միայն նախնական տրանշի մասին, որը խոստացվածի մեկ իններորդն է։

ԵՄ-ը բախվել է նոր մարտահրավերների, քանի որ ռուսական գազի լիակատար դադարեցման ուրվականը եւ դրամավարկային քաղաքականության խստացումը վտանգում են տարածաշրջանը երկու տարվա մեջ երկրորդ ռեցեսիայի մատնել։

Եվրոպական հանձնաժողովը պարտավորվել էր նաեւ մայիսին ֆինանսավորել երկրի վերակառուցման մեծ մասը, որը, Ուկրաինայի կառավարության գնահատականներով, կարող է կազմել 750 մլրդ դոլար։ Դա կարող է էլ ավելի սուր բանավեճ դառնալ ԵՄ-ի համար, քանի որ չկա համաձայնություն այն հարցում, թե ինչպես հավաքել այդ միջոցները։ Եվրոպական հանձնաժողովի առաջարկը վախեցրել է որոշ անդամ պետությունների, որոնք կարող են կոռուպցիայի հետ կապված պոտենցիալ խնդիրներ ունենալ։

Պատերազմի տնտեսական հետեւանքների ազդեցությունը ճնշում է գործադրում ԵՄ-ի կառավարությունների վրա, քանի որ նրանք սկսում են անհանգստանալ առաջիկա ամիսներին Կիեւի հանրային կարգի թուլացման վտանգի մասին, մանավանդ եթե էներգիան ավելի թանկանա եւ չբավականացնի։

ԵՄ-ի ֆինանսների նախարարների հանդիպման ընթացքում քննարկվել է Ուկրաինային օգնության ցուցաբերման հարցը, եւ 27 անդամ երկրների մոտ մեկ երրորդը նախազգուշացրել է, որ նոր միջոցներ կպահանջվեն ԵՄ-ի ներսում առավել խոցելի խմբերին աջակցելու համար, որպեսզի կանխվի Կիեւից դժգոհությունը։

Տնտեսության գծով եվրահանձնակատար Պաոլո Ջենթիլոնին հանդիպման ժամանակ նախարարներին փակ դռների հետեւում ասել է, որ ազգային կառավարությունները պետք է ապահովեն բավական ուժեղ տնտեսական ռեակցիա պատերազմի հետեւանքների հարցում, որպեսզի եվրոպացիների շրջանում հոգնածություն չառաջանա։ Ջենթիլոնին լրագրողներին հինգշաբթի ասել է, որ կառավարությունները «պարտավոր» են մեղմել ավելի բարձր գների, մասնավորապես, էլեկտրաէներգիայի հաշիվների ազդեցությունը։

Երեքշաբթի նախարարներին հաջողվել է պայմանավորվել Ուկրաինայի համար միայն 1 մլրդ եվրո վարկի մասին՝ որպես մակրոֆինանսական օգնության առաջին տրանշ։ Ֆինանսական փաթեթի մեծ մասը, որն ըստ էության հավանության է արժանացել ԵՄ-ի ղեկավարների կողմից մայիսին, արգելափակվել է մի քանի շաբաթով՝ Եվրահանձնաժողովի եւ Գերմանիայի միջեւ տարաձայնությունների պատճառով։

Աղբյուրների խոսքով՝ փակուղային իրավիճակը հազիվ թե լուծվի մինչեւ Բրյուսելի ամառային արձակուրդ գնալը։ Բոլոր 27 անդամ պետությունները պետք է իրենց համաձայնությունը տան օգնության փաթեթի պայմաններին։

Սկզբում Գերմանիան փորձել է համոզել հանձնաժողովին դրամաշնորհներ տալ, ոչ թե վարկեր, որպեսզի թեթեւացվի Ուկրաինայի պարտքի բեռը։ Հետո Բեռլինը սակարկել է ԵՄ-ի գործադիր իշխանության հետ՝ վարկերի պայմանների վերաբերյալ։

Եվրահանձնաժողովը խնդրել է անդամ երկրներին վարկերի գծով երաշխիքներ ներկայացնել։ Բայց Գերմանիան ցանկանում է փոքրացնել իր պարտավորությունների ծավալը՝ դա փաստարկելով նրանով, որ Ուկրաինային 1 մլրդ եվրոյի անհատույց դրամաշնորհ է հատկացրել Արժույթի միջազգային հիմնադրամի միջոցով, ասել է գերմանացի պաշտոնյան։ Բեռլինը մյուս անդամ պետություններին կոչ է արել լրացուցիչ երաշխիքներ տրամադրել։

Բացի այդ, 1,5 մլրդ եվրոյի վարկը, որը տրամադրել է Կիեւին Եվրոպական ներդրումային բանկը, նույնպես արգելափակված է մնում ԵՄ-ի մեխանիզմում, քանի որ հանձնաժողովը պահանջում է երաշխիքների ավելի մեծ ծավալ բանկի ստանդարտ գործառնությունների համեմատ։ Հանձնաժողովի ներկայացուցիչը հայտարարել է, որ ԵՄ-ը պետք է համոզվի, որ նա կկարողանա փակել վնասները Ուկրաինայի դեֆոլտի դեպքում։