Իտալիան կարող է արտակարգ դրություն մտցնել Ռուսաստանից գազի մատակարարման հետ կապված խնդիրների պատճառով․ ANSA

Իտալիայի իշխանությունները դիտարկում են ռուսական գազի մատակարարման հետ կապված խնդիրների պատճառով արտակարգ դրություն մտցնելու հնարավորությունը, հայտնում է ANSA-ն։

Նշվում է, որ Իտալիայի էկոլոգիական արդիականացման եւ փոխակերպման նախարարությունը արդեն հաջորդ շաբաթ (հունիսի 20-26-ը) կարող է ներկայիս նախազգուշացման մակարդակը բարձրացնել էներգամատակարարման ոլորտում «վտանգավոր» մակարդակի այն դեպքում, եթե Ռուսաստանից գազի մատակարարումը շարունակի կրճատվել։

Իտալական նախարարությունում պարզաբանել են, որ «վտանգավոր» մակարդակը չի ենթադրում որեւէ արտաշուկայական միջոցառում եւ նախատեսում է օպերատորների մատակարարման երաշխիքներ։

Ինչպես գրում է La Repubblica թերթը, Իտալիայի կառավարությունն արդեն աշխատում է գազի սպառումը նվազեցնելու ուղղությամբ։ Էներգառեսուրսների սակավության դեպքում սահմանափակումներ կմտցվեն տների եւ հասարակական հաստատությունների ջեռուցման կամ հովացման ջերմաստիճանի եւ տեւողության վրա՝ նվազեցնելով քաղաքների, ինչպես նաեւ ճանապարհների լուսավորությունը։

Միեւնույն ժամանակ, Իտալիան գնումների ավելացման շուրջ բանակցություններ է վարում Ալժիրից, Լիբիայից եւ Ադրբեջանից մատակարարների հետ։ Իշխանությունները դիտարկում են նաեւ ներքին արտադրության ծավալների ավելացումը, սակայն նրանք հասկանում են, որ դրա համար կպահանջվեն մեծ ներդրումներ, ինչպես նաեւ հորատման կանոնների վերանայում, որը երկրին մի քանի տարի առաջ փորձել են արգելել։