«Եթե Փաշինյանը 5000 մեր եղբայրներին չխղճաց, նա ոչ մի ոստիկանի չի խղճա, բոլորին կտանի կործանման». Հենրիխ Դանիելյան

ՀՀԿ ԵԿ նախագահ Հենրիխ Դանիելյանն այն կարծիքին է, որ ոստիկանությունը, Նիկոլ Փաշինյանի հրահանգները կատարելով, փորձում է վախեցնել ժողովրդին և ճնշել օր օրի մեծացող շարժումը:

«Նիկոլ Փաշինյանը սեր և խաղաղություն քարոզելով և խաղաղության քողի տակ եկավ իշխանության, հանձնեց Արցախը, մեր 5000 եղբայրներին սպանեց, որից հետո ասաց, որ կարող էր լինել նույն բանը, բայց առանց զոհերի, և այլն: Այսօր Նիկոլ Փաշինյանը հենվում է միայն ոստիկանության վրա, ոստիկանության մի մասն էլ կատարում է նրա անօրինական հրահանգները: Ոստիկանության մեջ կա հստակ շերտ, որը չի կատարում Փաշինյանի հրահանգները, այսինքն՝ նրանք հարգում են իրենց ուսադիրները, իրենց պետությունը: Ես վստահ եմ, որ որոշ ժամանակ հետո մենք ականատես կլինենք այդ ստի և խաբեության բուրգի ամբողջական փլուզմանը, և ոստիկանությունը կսկսի ընդհանրապես չկատարել Փաշինյանի հրահանգները, որովհետև նրա համար ո՛չ քաղաքացին արժեք ունի, ո՛չ ոստիկանը: Երեկ հստակ սադրանք է տեղի ունեցել, սադրել են ոչ թե քաղաքացիներն ու այդտեղ կանգնած ոստիկանները, այլ ինֆորմացիա կա, որ սադրիչներ են եղել իշխանության կողմից ուղարկված, ովքեր ինչ-որ բաներ են նետել ոստիկանների վրա, ոստիկանների կողմից էլ բաներ են նետել քաղաքացիների վրա, որի արդյունքում էլ բախում է ստեղծվել»,- 168TV-ի «Ռեվյու» հաղորդման ընթացքում ասաց նա:

Նա ընդգծեց, որ ոստիկանները կին և երեխա հաշվի չեն առել և ահավոր ծեծի են ենթարկել ժողովրդին. «Հնարավոր է՝ եղած լինեն դեպքեր, որ մեկի մորը կամ քրոջը ոստիկանը հարվածած լինի, այդ կնոջ զավակը կամ եղբայրը աֆեկտի տակ ինչ-որ բան արած լինի ոստիկանին: Բայց հիմնականում եղել են սադրիչներ, ովքեր հստակ ուղղորդված եկել են, որպեսզի սադրեն:

Ընդհանրապես հատուկ միջոց կիրառելու կարիք չկար, որովհետև ընթանում էր խաղաղ ցույց՝ հստակ պահանջով: Ոչ մի սպառնալիք չի եղել: Իշխանությունները վախենում են իրենց սեփական շողքից, որովհետև ժողովրդական ասացվածք կա՝ գող՝ սիրտը դող. Իրենք գիտեն, որ դավաճան են, խաբեբա են, որ իրենց ուսերին կա մեծ պատասխանատվություն, և նրանք հայտնվելու են պատմության աղբանոցում, և ամեն գնով փորձում են դա թույլ չտալ: Այդ պատմության աղբանոցում հայտնվելու է նաև այն ոստիկանը, որը ժողովրդի վրա ձեռք է բարձրացնում:

Այն մարդիկ, ովքեր մահակներ են բարձրացնում կամ կրակում են ժողովրդի վրա, օրենքի ողջ խստությամբ պատասխան են կրելու և դատվելու են, այդ մարդկանց ուզում եմ կոչ անել՝ զգոն լինել, որովհետև, երբ իրենք այսօր ասում են՝ տուն ենք պահում, վաղն էլ պետք է կարողանան այդ տունը պահել, իսկ եթե լինեն դատված, չեն կարողանալու այդ տունը պահել: Դրա համար պետք չէ Փաշինյանի հրահանգները լսել, եթե նա 5000 մեր եղբայրներին չխղճաց, նա ոչ մի ոստիկանի չի խղճա, նա բոլորին կտանի կործանման»:

Հենրիխ Դանիելյանը նկատեց՝ Նիկոլ Փաշինյանն իշխանությունը պահելու համար ոչնչի առաջ կանգ չի առնի. «Իսկ մենք կանգ չենք առնի, որպեսզի մեր պետականությունը պահպանենք: Մեր շարքերն օր օրի ավելանում են: Եթե փողոց դուրս գա 100 հազար մարդ, ուժայինները ֆիզիկապես ոչինչ չեն կարող անել, որովհետև այդ 100 հազարի մեջ լինելու են ոստիկանների մայրերը, քույրերը, եղբայրները, և ոստիկանը իր հարազատի վրա ձեռք չի բարձրացնի»:

Մանրամասները՝ 168TV-ի տեսանյութում