Ավստրալիան 35 տոկոս լրացուցիչ մաքսատուրք է սահմանել Ռուսաստանից եւ Բելառուսից ներկրվող բոլոր ապրանքների վրա

Ավստրալիայի կառավարությունը 35 տոկոսի չափով լրացուցիչ մաքսատուրք է սահմանում Ռուսաստանից եւ Բելառուսից ներկրվող բոլոր ապրանքների վրա՝ այդ երկրների վրա տնտեսական ճնշումը մեծացնելու համար։ Այս մասին հինգշաբթի հայտարարությամբ է հանդես եկել Ավստրալիայի վարչապետ Սքոթ Մորիսոնը։

«Ավստրալիայի կառավարությունը հետագա քայլեր է ձեռնարկում՝ Ուկրաինա ներխուժման պատճառով Ռուսաստանի եւ նրան աջակցող Բելառուսի համար տնտեսական ծախսերը մեծացնելու համար։ 2022 թվականի ապրիլի 25-ից մենք լրացուցիչ 35 տոկոս մաքսատուրք կկիրառենք Ռուսաստանի Դաշնությունից եւ Բելառուսից ներմուծվող բոլոր ապրանքների համար»,- ասվում է Մորիսոնի հայտարարության մեջ, որը հրապարակված է երկրի կառավարության կայքում։

Վարչապետը նաեւ նշել է, որ Ավստրալիայի կառավարության համապատասխան հրամանը կհրապարակվի 2022 թվականի ապրիլի 1-ին, իսկ ապրիլի 25-ից ուժի մեջ կմտնեն նոր կանոնները, որից հետո Ռուսաստանից եւ Բելառուսից ապրանքներ ներմուծելիս 35 տոկոս լրացուցիչ առեւտրային սակագին կկիրառվի, մյուս վճարներից բացի։ «Մենք կշարունակենք աշխատել մեր գործընկերների հետ՝ Ռուսաստանի համար առավելագույն տնտեսական ծախսեր ապահովելու համար՝ պատժամիջոցներ կիրառելով նրա քաղաքացիների եւ կազմակերպությունների նկատմամբ, արգելելով ռուսական նավթի եւ գազի ներմուծումը եւ ավստրալիական կավահողի եւ ալյումինի հանքաքարերի արտահանումը ՌԴ»,- ասել է վարչապետը:

Այս պահին Ավստրալիան պատժամիջոցներ է սահմանել Ռուսաստանի եւ Բելառուսի ավելի քան 500 քաղաքացիների, այդ թվում՝ երկու երկրների նախագահներ Վլադիմիր Պուտինի եւ Ալեքսանդր Լուկաշենկոյի, ինչպես նաեւ մի շարք կազմակերպությունների, հաստատությունների եւ գերատեսչությունների դեմ: Կան նաեւ զգալի տնտեսական պատժամիջոցներ, այդ թվում՝ զենքի եւ բաղադրիչների, հումքի եւ նավթի եւ գազի արդյունահանման համար սարքավորումների արտահանման արգելքը։ Ներմուծման արգելքը վերաբերում է ռուսական էներգիայի աղբյուրներին, զենքերին եւ բաղադրիչներին, ինչպես նաեւ երկակի նշանակության ապրանքներին, որոնք կարող են օգտագործվել զենքի և բաղադրիչների արտադրության համար։

Ռուսաստանից Ավստրալիա ներմուծման ընդհանուր ծավալը փոքր է (տարեկան 45 մլն դոլարից պակաս) եւ հիմնականում բաժին է ընկնում մայրցամաքում չարտադրվող ապրանքներին։ Դրանց թվում են պարարտանյութերը, հում նավթը, անօրգանական թթուների եւ մետաղների աղերը։ Բելառուսից Ավստրալիան դաբաղանյութեր, ներկանյութեր եւ գունանյութեր, թուղթ, ստվարաթուղթ եւ ցելյուլոզ, ինչպես նաեւ որոշ դեղագործական ապրանքներ է ստանում: Այդ ներմուծման ընդհանուր ծավալը չի ​​գերազանցում տարեկան 10 մլն դոլարը։