Պետդեպ. Մենք աշխատում ենք, որպեսզի Ուկրաինան ՀՕՊ համակարգեր ստանա

Պետքարտուղարությունը հայտնել է, որ ուշադիր հետեւում է Մարիուպոլի շուրջ ստեղծված իրավիճակին, ինչպես նաեւ ստուգում է Ռուսաստանի կողմից հնարավոր ռազմական հանցագործությունների մասին ստացվող տեղեկատվությունը: Այս մասին ճեպազրույցի ժամանակ հայտարարել է ԱՄՆ ԱԳՆ մամուլի քարտուղար Նեդ Փրայսը, փոխանցում է «Ամերիկայի ձայնը»։

«Մենք շարունակում ենք ամեն օր ապացույցներ տեսնել, որոնք վկայում են գործողությունների մասին, որոնք կարող են ռազմական հանցագործություն լինել: Մենք շատ ուշադիր ուսումնասիրում ենք առկա տեղեկությունները, որպեսզի պաշտոնապես որոշենք՝ ռազմական հանցագործություններ կատարվել են, թե ոչ, - ասել է Նեդ Փրայսը:- Մենք տեսել ենք Մարիուպոլի բնակիչների՝ Ռուսաստան բռնի տեղափոխման մասին հաղորդումները։ Մենք ուսումնասիրում ենք այդ տեղեկատվությունը։ ԱՄՆ-ն սերտորեն խորհրդակցում է իր ուկրաինացի գործընկերների հետ: Այդ հաղորդումները չափազանց մտահոգիչ են եւ, եթե հաստատվեն, խաղաղ բնակիչների նկատմամբ դաժան վերաբերմունքի լրացուցիչ ապացույցը կդառնան»:

Նա հավելել է, որ ԱՄՆ-ն շարունակում է կոչ անել Ռուսաստանի կառավարությանը թույլ տալ խաղաղ բնակիչներին ազատ եւ անվտանգ լքել Մարիուպոլը, ինչպես նաեւ թույլ տալ մարդասիրական կազմակերպություններին անհրաժեշտ օգնությունը տրամադրել։

Պետդեպն աջակցություն է հայտնել Կիեւին եւ հավելել, որ, չնայած նախագահ Զելենսկու խաղաղ նախաձեռնություններին, Ռուսաստանը հակամարտությունը դիվանագիտական ​​ճանապարհով լուծելու ձգտում չի ցուցադրում:

«Նույնիսկ չնայած նրան, որ այս պահին մենք շատ քիչ նշաններ ենք տեսնում առ այն, որ Ռուսաստանը լուրջ է վերաբերվում դիվանագիտությանը, մենք աշխատում ենք մի քանի ուղղությամբ՝ Ուկրաինայի դիրքերը բանակցությունների սեղանի շուրջ ամրապնդելու համար,- ասել է Նեդ Պրայսը:- Մենք արդեն մեր ուկրաինացի գործընկերներին աննախադեպ 2 միլիարդ դոլարի աջակցություն ենք տրամադրել անվտանգության ոլորտում: ԱՄՆ-ն նաեւ տրամադրել է հենց այն համակարգերը, հնարավորությունները եւ ակտիվները, որոնք անհրաժեշտ կլինեն Ուկրաինային եւ որոնք այն կօգտագործի ռուսական ագրեսիայից արդյունավետորեն պաշտպանվելու համար»:

Պետդեպի ներկայացուցիչը նաեւ նշել է, որ սահմանած պատժամիջոցները հարված են հասցնում «ռուսական տնտեսությանը, դրա ֆինանսական համակարգին, ինչպես նաեւ՝ ռազմավարական դիրքին աշխարհում»։

«Նախագահ Պուտինը մի շարք սխալ հաշվարկներ թույլ տվեց: Նա շատ սխալ էր հաշվարկել, երբ կարծում էր, որ իր զորքերը կարող են մի քանի ժամվա ընթացքում եւ առանց դիմադրության հանդիպելու անցնել Ուկրաինայով եւ ուժով գրավել երկիրը, այդ թվում՝ դրա խոշոր քաղաքները: Նախագահ Պուտինը սխալ էր հաշվարկել, եթե կարծում էր, որ չի բախվի այն ծանր տնտեսական և ֆինանսական հետեւանքներին, որոնք նախագահ Բայդենը եւ միջազգային հանրությունը խոստացել էին, եթե այդ ներխուժումը շարունակվի:

Նեդ Փրայսի խոսքով՝ «սա այն պատերազմ չէ, որին ռուսները միաձայն աջակցում են»։

«Ռուսաստանի կառավարությունը, Կրեմլն արել են հնարավոր ամեն ինչ, որպեսզի էլ ավելի շատ փորձեն վերահսկել տեղեկատվական միջավայրն, քան դա արվում էր նախկինում։ Չնայած տեղեկատվական ուղիների ճնշմանը, ցուցարարներին, ավելի քան 15000 խաղաղ ցուցարարի ձերբակալությանը, կան հստակ նշաններ, որ պատերազմը լիակատար աջակցություն չունի Ռուսաստանի քաղաքացիների շրջանում»,- ընդգծել է նա։

Նեդ Փրայսը նաեւ հայտարարել է, որ ԱՄՆ-ն սերտորեն համագործակցում է Ուկրաինայի հետ Կիեւին հակաօդային պաշտպանության համակարգեր տրամադրելու մասով:

«Ինչ վերաբերում է «Ս-300»-ի նման համակարգերին, մենք աշխատում ենք օգնել Ուկրաինային մեծ հեռահարության հակաօդային պաշտպանության համակարգերի եւ դրանց զինամթերքի ձեռք բերման հարցում:- հայտարարել է Նեդ Փրայսը:- Պետքարտուղար Բլինքենը հաստատել է մեր 14 գործընկերներից Ուկրաինային ամերիկյան արտադրության ռազմական տեխնիկայի մատակարարումը։ Մենք աշխատում ենք ԱՄՆ պաշտպանության նախարարության եւ այլոց հետ՝ նման համակարգերի առկայության եւ, ի վերջո, մեր ուկրաինացի գործընկերներին դրանց տրամադրման ուղղությամբ՝ լինի դա ԱՄՆ, թե այլ երկրի արտադրության»: