Անդրեյ Մելնիչենկո. աշխարհին գլոբալ պարենային ճգնաժամ է սպասվում

«Եվրոքիմ» պարարտանյութերի արտադրողի եւ Սիբիրի ածխային էներգետիկ ընկերության սեփականատեր, միլիարդատեր Անդրեյ Մելնիչենկոն կարծում է, որ աշխարհին գլոբալ պարենային ճգնաժամ է սպասվում, եթե Ուկրաինայում պատերազմը չդադարեցվի։

Նրա խոսքով՝ պարարտանյութի գներն այնքան արագ են բարձրանում, որ շատ ֆերմերներ այլեւս չեն կարողանում դրանք գնել։

«Ուկրաինայում տեղի ունեցող իրադարձություններն իսկապես ողբերգական են։ Մեզ շտապ խաղաղություն է պետք»,- ասել է Մելնիչենկոն Reuters-ին տված հարցազրույցում։ «Այս ճգնաժամից առաջինը կտուժի գյուղատնտեսության եւ պարենային ոլորտը»,- ասել է Մելնիչենկոն։

Ռուսաստանը կալիումական, ֆոսֆորական եւ ազոտ պարունակող պարարտանյութերի հիմնական արտադրողն է։ «Եվրոքիմ»-ը, որն արտադրում է ազոտ, ֆոսֆատ եւ կալիում, հայտարարում է, որ պարարտանյութ արտադրող աշխարհի առաջատար հինգ ընկերություններից մեկն է։

Մելնիչենկոն նշել է, որ պատերազմն «արդեն հանգեցրել է պարարտանյութերի գների կտրուկ աճի, որոնք ֆերմերներն այլեւս չեն կարող իրենց թույլ տալ»։ «Դա կհանգեցնի Եվրոպայում պարենային ապրանքների էլ ավելի բարձր գների եւ աշխարհի ամենաաղքատ երկրներում սննդի հավանական պակասի», - ասել է նա։

Forbes-ը 2021թ․ Մելնիչենկոյի կարողությունը գնահատել է 18 միլիարդ դոլար, ինչը նրան դարձնում է Ռուսաստանում ութերորդ ամենահարուստ մարդը:

Եվրամիությունը պատժամիջոցներ է սահմանել Մելնիչենկոյի դեմ ռուսական ներխուժման համար։