ՌԴ Կենտրոնական բանկը բարձրացրել է հիմնական տոկոսադրույքները՝ մինչև տարեկան ռեկորդային 20%-ի

ԿԲ-ի հիմնական տոկոսադրույքի նիշը, որից կախված են դեպոզիտների տոկոսադրույքներն ու վարկերի արժեքայնությունը, արտապլանային եղանակով ավելացել է առավել քան 2 անգամ՝ 9.5-ից դառնալով 20 %: Այն նիշը բացարձակ ռեկորդ է: Այս մասին տեղեկացնում է rbc.ru-ն:

Ռուսաստանի բանկի տնօրենների խորհրդի որոշմամբ՝ տոկոսադրույքները կբարձրանան այսօրվանից:

Այս բարձրացման անհրաժեշտությունը ԿԲ-ն բացատրել է ռուսաստանյան տնտեսության արտաքին պայմանների կարդինալ փոփոխությամբ:
Ինչպես պարզաբանել են ԿԲ-ում, հիմնական տոկոսադրույքի կտրուկ աճը կհանգեցնի ռուսաստանյան բանկերում ավանդների տոկոսադրույքների նույնքան լուրջ աճի, ինչը պետք է փոխհատուցի ավանդատուներին «դեվալվացիոն և գնաճային ավելացող ռիսկերը»:

«Սա թույլ կտա պահպանել ֆինանսական և գնային կայունությունը և քաղաքացիների խնայողությունները պաշտպանել արժեզրկումից»,- ասված է ԿԲ հաղորդագրության մեջ:
Կարգավորիչ մարմինն այս քայլին է գնացել արտահերթ նիստի ժամանակ՝ Ուկրաինայում Ռուսաստանի ռազմական գործողության հետևանքով շուկաների փլուզման ու ռուսաստանյան խոշոր բանկերի և, ինչն ավելի կարևոր է, հենց Կենտրոնական բանկի դեմ պատժամիջոցների կիրառման ֆոնին:

Կենտրոնական բանկը մտադիր է ապագայում փոխել հիմնական տոկոսադրույքը՝ «ելնելով արտաքին և ներքին պայմաններից եկող ռիսկերի գնահատումից», ինչպես նաև այդ սպառնալիքներին ֆինանսական շուկաների արձագանքից՝ հաշվի առնելով «գնաճի փաստացի և սպասվող դինամիկան»,- ասված է հայտարարության մեջ։ Մոսկվայի ժամանակով ժամը 16:00-ին նախատեսված է Ռուսաստանի Բանկի ղեկավար Էլվիրա Նաբիուլինայի ելույթը։